Kryeministri i Shqipërisë ka deklaruar se Franca vazhdon të mbështesë procesin e anëtarësimit të Shqipërisë në Bashkimin Evropian, pas një takimi të zhvilluar në Paris me presidentin francez. Edi Rama tha në podkastin “Flasim” se takimi me presidentin francez ishte një tjetër hap në forcimin e marrëdhënieve dhe dialogut politik mes dy vendeve.
Sipas tij, në bisedimet me presidentin francez është diskutuar ecuria e partneritetit strategjik Shqipëri–Francë, si dhe perspektiva evropiane e vendit në kuadër të procesit të zgjerimit të BE-së.
Emmanuel Macron është shprehur, sipas Ramës, në mbështetje të vijimit të integrimit të Shqipërisë në familjen evropiane, duke e cilësuar Francën si një aktor kyç në procesin e zgjerimit të Bashkimit Evropian.
Rama ka theksuar gjithashtu se në diskutime janë përfshirë edhe zhvillimet gjeopolitike në Evropë, përfshirë mbështetjen për Ukrainën dhe rëndësinë e një qasjeje të përbashkët për sigurinë dhe stabilitetin në kontinent.
Ai shtoi se procesi i integrimit të Ballkanit Perëndimor dhe rindërtimi i Ukrainës duhet të shihen si pjesë e një strategjie të vetme për një Evropë më të bashkuar dhe më të qëndrueshme. Sinjali – aty ku e vërteta flet para lajmit!