Presidentja e Moldavisë, Maia Sandu, ka emëruar biznesmenin proevropian Vasile Tofan si kandidat për postin e kryeministrit, pas dorëheqjes së Alexandru Munteanu në fillim të këtij muaji për shkak të mospajtimeve me shumicën qeverisëse.
Në një video të publikuar në rrjetet sociale, Sandu tha se detyra kryesore e Tofanit, nëse miratohet nga parlamenti, do të jetë përshpejtimi i integrimit të Moldavisë në Bashkimin Evropian. Ajo shtoi se qeveria e re duhet gjithashtu të forcojë qëndrueshmërinë e institucioneve shtetërore dhe të shoqërisë, si dhe të rigjallërojë ekonominë, e cila prej vitesh po përballet me vështirësi.
Tofan tani ka dy javë kohë për të siguruar mbështetjen e parlamentit, duke paraqitur programin qeverisës dhe përbërjen e kabinetit ministror. Emri i tij ishte përmendur si kandidat për kryeministër edhe vitin e kaluar, para se në këtë detyrë të emërohej Alexandru Munteanu.
Kryetari i Partisë së Veprimit dhe Solidaritetit (PAS), Igor Grosu, njoftoi se Tofan ishte zgjedhja e partisë për të udhëhequr qeverinë. Sipas tij, ai ndan të njëjtat objektiva me PAS-in, përfshirë anëtarësimin e Moldavisë në BE, reformat institucionale dhe zhvillimin ekonomik.
Vasile Tofan është diplomuar në Harvard Business School, ka përfunduar studimet për menaxhim publik në Holandë dhe është partner drejtues në kompaninë e investimeve Horizon Capital, e cila operon kryesisht në Ukrainë dhe Moldavi. Ai ka qenë gjithashtu kryetar i bordit të kantinës së njohur moldave Purcari.
Paraardhësi i tij, Alexandru Munteanu, u largua nga posti më 3 korrik, pas më pak se tetë muajsh në detyrë. Ai deklaroi se nuk mund ta ushtronte më mandatin “në përputhje me parimet dhe bindjet e tij”. Muajin e kaluar, Bashkimi Evropian hapi zyrtarisht raundin e parë të negociatave të anëtarësimit me Moldavinë dhe Ukrainën. Të dy vendet morën statusin e kandidatit për anëtarësim në BE më .