Presidenti i Shteteve të Bashkuara, Donald Trump, ka shpërndarë në rrjetet sociale një imazh ku ai shfaqet krah kryeministres së Italisë, Giorgia Meloni, i shoqëruar me një mbishkrim që thoshte: “Nevojitet një urdhër kufizues”. Ky term i referohet një mase ligjore që vendos kufizim afrimi ndaj një personi tjetër, përmes urdhrit të gjykatës.
Postimi është publikuar vetëm pak orë para samitit të NATO-s që pritet të mbahet në Ankara më 7 dhe 8 korrik, ku të dy liderët janë paraparë të marrin pjesë. Sipas mediave italiane, përfshirë “Corriere della Sera”, autoritetet në Romë nuk kanë planifikuar të reagojnë ndaj këtij veprimi, të cilin disa e kanë cilësuar si provokues.
Ky zhvillim vjen në një periudhë të ndjeshme të marrëdhënieve mes Uashingtonit dhe Romës, të cilat janë shoqëruar me tensione dhe mosmarrëveshje në disa çështje ndërkombëtare, përfshirë politikat në Lindjen e Mesme dhe qëndrimet brenda NATO-s.
Marrëdhëniet mes dy vendeve janë përkeqësuar më tej pas deklaratave të mëparshme të Trump, të cilat janë kundërshtuar nga kryeministrja italiane, duke shkaktuar edhe reagime politike në Itali dhe zhvillime diplomatike në vazhdim. https://truthsocial.com/@realDonaldTrump/116869343915433662 Sinjali – aty ku e vërteta flet para lajmit!