Fitorja 2:1 e Anglisë ndaj Norvegjisë pas vazhdimeve dhe kualifikimi në gjysmëfinalen e Kupës së Botës u prit me komente të ndryshme në mediat angleze. Edhe pse rezultati ishte pozitiv, analiza e lojës nuk ishte aq entuziaste. The Guardian vlerësoi se Anglia vuajti shumë për të siguruar kualifikimin. “Anglia luftoi deri në fund, në disa momente pati edhe fat, por nuk u dorëzua kurrë.
Diferencën e bëri gjerësia e skuadrës dhe cilësia e futbollistëve që u aktivizuan nga stoli. Në fund festuan, por pa eufori, sepse të gjithë ishin të rraskapitur”, shkruan gazeta. Në BBC, ish-sulmuesi anglez Alan Shearer deklaroi: “Nga t’ia fillojmë? Edhe një tjetër zhgënjim pas golit të pësuar, por kjo Angli është e ndërtuar me karakter të fortë.
Në pjesën e dytë u detyrua të vuante dhe të mbrohej nën presion, por sërish gjeti mënyrën për të fituar. Nuk është aspak çudi që edhe këtë herë shpëtimtari ishte Jude Bellingham.” Ndërkaq, ish-portieri Paul Robinson, po ashtu për BBC, u shpreh kritik ndaj paraqitjes së skuadrës. “Nga t’ia nisim? Edhe një herë na çuan në kufijtë e durimit.
Kjo nuk ishte Anglia e vërtetë, por më e rëndësishmja është se objektivi u arrit. Nuk më bindën as ndryshimet taktike të Thomas Tuchelit, megjithatë ekipi iu përmbajt planit. Kur ke lojtarë si Jude Bellingham dhe Harry Kane, ke futbollistë që vendosin ndeshjet e mëdha.” Edhe tabloidi ‘The Sun’ vuri në pah rolin vendimtar të Jude Bellingham.
“Pikërisht kur dukej se rruga e Anglisë kishte përfunduar, rrugëtimi drejt lavdisë vazhdoi. Për pjesën më të madhe të mbrëmjes Anglia dukej si një skuadër që po përgatitej të kthehej në shtëpi, por gjithçka ndryshoi në fund. Kur ke Jude Bellinghamin, gjithmonë ke një shans”, shkruan ‘The Sun’.