Ish-kryeministri i Kosovës, Avdullah Hoti, ka reaguar pas deklaratave të së Ngarkuarës me Punë në Ambasadën e Shteteve të Bashkuara në Kosovë, Anu Prattipati, lidhur me nevojën për diversifikimin e burimeve energjetike të vendit.
Hoti ka thënë se përfaqësuesja amerikane ka përsëritur edhe një herë rëndësinë e projektit të gazit amerikan, duke e cilësuar atë si një hap të rëndësishëm për sektorin energjetik të Kosovës. Përmes një postimi, Hoti ka deklaruar se SHBA-ja vazhdon të kërkojë që Kosova të zgjerojë burimet e furnizimit me energji dhe të mos mbështetet vetëm në burimet aktuale.
“Edhe sot, duke iu referuar projektit të gazit amerikan, përfaqësuesja e SHBA-së në Kosovë kërkoi që Kosova të diversifikojë burimet energjetike”, ka shkruar Hoti. Ai ka theksuar gjithashtu se është përshëndetur edhe angazhimi i Odës Ekonomike Amerikane në mbështetje të këtij projekti strategjik.
Debati për diversifikimin e energjisë në Kosovë vazhdon të jetë një nga temat kryesore në sektorin energjetik, ndërsa institucionet kanë diskutuar për alternativa të reja për furnizim më të qëndrueshëm. Sinjali – aty ku e vërteta flet para lajmit!