Gjeorgjia është përballur me kritika dhe akuza për izolim ndërkombëtar, pasi për herë të parë nuk është ftuar në samitin e NATO-s, i cili u mbajt në Ankara të Turqisë.
Ndërsa vende partnere të aleancës si Ukraina, Japonia, Koreja e Jugut, Australia, Zelanda e Re, Katari dhe Emiratet e Bashkuara Arabe morën pjesë në aktivitetet e lidhura me sigurinë rajonale, Gjeorgjia mungoi në agjendën zyrtare të samitit dhe në forumet shoqëruese.
Mungesa e Tbilisit ka nxitur debat të madh në vend, pasi Gjeorgjia për vite me radhë e ka cilësuar afrimin me Bashkimin Evropian dhe NATO-n si objektiv strategjik kombëtar, raporton Euronews, transmeton Sinjali. Opozita gjeorgjiane e ka cilësuar këtë një sinjal të humbjes së ndikimit të vendit në arenën ndërkombëtare.
Përfaqësues të saj kanë thënë se kjo është hera e parë në historinë e Gjeorgjisë që vendi nuk përfaqësohet në një samit të NATO-s. Nga ana tjetër, përfaqësuesit e partisë në pushtet “Ëndrra Gjeorgjiane” kanë mohuar se vendi po izolohet, duke deklaruar se samiti nuk përfshinte takime të tilla ku Gjeorgjia kishte marrë pjesë më herët.
Ministria e Jashtme e Gjeorgjisë tha se ministrja Maka Bochorishvili do të merrte pjesë në një aktivitet tjetër në Turqi, të quajtur “Aleatët në Ankara”, por kritikët theksuan se ai aktivitet nuk ishte pjesë e samitit të NATO-s.
Analistë dhe ish-diplomatë gjeorgjianë kanë paralajmëruar se marrëdhëniet e vendit me partnerët perëndimorë janë dëmtuar, duke përmendur shqetësimet e aleatëve për kursin politik të qeverisë së Tbilisit.
Bashkimi Evropian ka pezulluar procesin e anëtarësimit të Gjeorgjisë dhe ka reduktuar mbështetjen financiare pas miratimit të një ligji për “influencën e huaj”, të cilin Brukseli e ka kritikuar si të ngjashëm me ligjet ruse dhe si kërcënim për demokracinë.
Megjithatë, qeveria gjeorgjiane këmbëngul se rruga drejt integrimit evropian mbetet objektiv i saj dhe se vendi synon të vazhdojë bashkëpunimin me partnerët ndërkombëtarë. Sinjali – aty ku e vërteta flet para lajmit!