Aktori i njohur amerikan Danny Glover ka zbuluar se prej disa vitesh po jeton me sëmundjen e Alzheimerit. 79-vjeçari e bëri publik lajmin gjatë një interviste për NBC, ku tregoi se diagnozën e mori pak kohë pasi u nderua me çmimin e nderit Oscar në vitin 2022. Edhe pse pranon se lëvizjet, të folurit dhe kujtesa e tij janë ngadalësuar, ai theksoi se vazhdon të jetë aktiv.
“Mund të jetoj me të. Jam i sigurt se, ndërsa sëmundja përparon, gjërat do të jenë ndryshe dhe do të ndryshojnë”, u shpreh aktori. Glover, fitues i katër çmimeve Emmy, është i njohur për rolet e tij në filmat “Lethal Weapon” dhe “The Color Purple”, si edhe për një karrierë që numëron mbi 170 role në film dhe televizion.
Në intervistë, vajza e tij Mandisa Glover tha se familja vendosi të flasë hapur për diagnozën e aktorit për të ndihmuar në luftën kundër paragjykimeve që shoqërojnë Alzheimerin. “Mendoj se është shumë e rëndësishme që ai të ketë kontroll mbi historinë e tij. Tani është momenti i duhur që ta tregojë vetë,” u shpreh ajo.
Glover foli edhe për pasionin për artin dhe drejtësinë sociale, duke theksuar se arti mbetet një mënyrë për të kuptuar dhe reflektuar mbi sfidat e botës. “Bota përballet me shumë sfida. Arti na ndihmon t’i shohim ato nga një këndvështrim tjetër,” tha aktori.