Shpërndaje në: Angelina Jolie rikthehet si regjisore me dramën “Without Blood”, të bazuar në romanin me të njëjtin titull të autorit italian Alessandro Baricco, nga një skenar që ajo e bashkëshkroi me vetë shkrimtarin.
Filmi, me Salma Hayek Pinault, Demián Bichir dhe Juan Minujín në rolet kryesore, zhvillohet pas një konflikti të papërcaktuar dhe trajton temat e luftës, kujtesës dhe pajtimit. Pas premierës në Festivalin Ndërkombëtar të Filmit në Toronto në vitin 2024, “Without Blood” është blerë nga Brainstorm Media dhe do të shfaqet në kinematë amerikane më 18 shtator.
Projekti vjen ndërsa Jolie vazhdon të ndërthurë karrierën e saj si regjisore me atë si aktore. Duke folur për filmin, Jolie tha se romani i Bariccos trajton të vërteta universale mbi traumën, kujtesën dhe shërimin. Ajo vlerësoi punën e aktorëve dhe ekipit, duke shprehur shpresën se interpretimet e Salma Hayek dhe Demián Bichir do të nxisin diskutime mbi mesazhin që përcjell vepra.
Salma Hayek e cilësoi bashkëpunimin me Angelina Jolie si një përvojë thellësisht pasuruese, duke theksuar se ndjeshmëria dhe inteligjenca emocionale e regjisores i japin jetë një historie mbi plagët që lë lufta dhe forcën e nevojshme për të vazhduar përpara.
Drejtuesit e Brainstorm Media dhe Fremantle e përshkruan filmin si një vepër të fuqishme që trajton koston njerëzore të luftës dhe rëndësinë e empatisë. “Without Blood” shënon filmin më të fundit të Jolie pas “In the Land of Blood and Honey”, “Unbroken” dhe “First They Killed My Father”.