Një ngjarje e rëndë është raportuar në Brazil, ku një grua ka humbur jetën gjatë një përpjekjeje të dyshuar për “ekzorcizëm”, ndërsa partneri i saj ka pranuar se e ka sulmuar duke besuar se ajo ishte e pushtuar nga demonë. Viktima, e identifikuar si Marceli de Oliveira Gotardo, u gjet e pajetë në një apartament në lagjen Jardim Limoeiro, në komunën Serra, në shtetin Espírito Santo.
Sipas policisë, fqinjët dëgjuan zhurma dhe britma nga apartamenti dhe njoftuan autoritetet, pasi fillimisht tentuan të kontaktonin përmes interfonit të ndërtesës. Kur oficerët mbërritën në vendngjarje, e gjetën gruan pa shenja jete. Raportimet tregojnë se dëshmitarët vunë re lëndime të rënda në trupin e saj, përfshirë shenja mbytjeje, goditje në fytyrë dhe gjakderdhje.
Një ekspertizë mjeko-ligjore më vonë përcaktoi si shkak vdekjeje hemorragji intrakraniale dhe dëmtime traumatike të trurit të shkaktuara nga goditje të forta me objekt të topitur. Partneri i saj, Brian Fernando Jimenez Souza, 26 vjeç, u arrestua menjëherë në vendngjarje.
Ai deklaroi para policisë se të dy kishin konsumuar drogë më herët gjatë ditës dhe se më pas ai kishte besuar se gruaja ishte “e pushtuar”, duke pretenduar se po përpiqej të “dëbonte demonët”. Autoritetet konfirmuan gjithashtu praninë e kokainës dhe paketimeve të zbrazëta në apartament.
Souza është akuzuar për vrasje të rëndë dhe është transferuar në një burg në pritje të hetimeve të mëtejshme në Brazil.