Kombëtarja e Brazilit ka regjistruar fitoren e tretë radhazi në Kupën e Botës, duke e mposhtur Skocinë me rezultat bindës 3-0 dhe duke konfirmuar formën e shkëlqyer në fazën e grupeve. Brazilianët e nisën ndeshjen në mënyrën më të mirë të mundshme, duke kaluar në epërsi që në minutën e 8-të.
Vinicius Junior përfitoi nga një gabim i rëndë i mbrojtësit skocez Kieran McKenna, i cili humbi topin gjatë përpjekjes për të ndërtuar aksionin nga mbrojtja. Sulmuesi brazilian u tregua i saktë përballë portierit dhe realizoi për 1-0.
Vinicius mendoi se kishte dyfishuar epërsinë në minutën e 23-të, pasi i mori topin Jack Hendry-t dhe e dërgoi në rrjetë, por pas ndërhyrjes së VAR-it goli u anulua për faull në sulm. Megjithatë, ylli brazilian nuk do të mbetej pa golin e dytë. Në minutën e katërt të kohës shtesë të pjesës së parë, Casemiro harkoi saktë në zonë, ndërsa Vinicius realizoi pa vështirësi për 2-0.
Brazili ishte pranë golit të tretë edhe para pushimit, por portieri Angus Gunn reagoi mjaft mirë në një situatë një kundër një ndaj Rayan. Skocia tentoi të reagojë në pjesën e dytë dhe krijoi rrezik kryesisht nga goditjet standarde. Rasti më i mirë erdhi në minutën e 49-të, kur Scott McTominay provoi me kokë nga afërsia, por Alisson ishte i vëmendshëm dhe priti pa probleme.
Çështja e fituesit u mbyll përfundimisht në minutën e 60-të. Pas një aksioni të bukur kolektiv, Bruno Guimaraes asistoi për Matheus Cunha, i cili realizoi lehtësisht për rezultatin 3-0. Alisson vazhdoi paraqitjen e tij të shkëlqyer edhe në minutën e 64-të, duke ndalur një tjetër tentativë të rrezikshme me kokë nga McTominay.
Në minutën e 78-të, Neymar u aktivizua nga stoli, duke u pritur me duartrokitje të mëdha nga tifozët e pranishëm. Vetëm një minutë më vonë, Vinicius humbi mundësinë për të kompletuar tregolëshin, ndërsa në fund të takimit edhe Neymar provoi të gjente rrjetën, por u ndal nga Angus Gunn.
Në minutat e fundit, Alisson realizoi edhe një pritje vendimtare ndaj McTominay, duke ruajtur portën e paprekur dhe duke vulosur një fitore plotësisht të merituar të Brazilit me rezultat 3-0. Sinjali – aty ku e vërteta flet para lajmit!