Harry Kane mbetet lideri i padiskutueshëm i sulmit të Anglisë dhe zgjedhja e parë e Thomas Tuchel për rolin e sulmuesit qendror, por ish-sulmuesi i “Tre Luanëve”, Stan Collymore, beson se lojtarët që vijnë nga stoli do të kenë një rol vendimtar në Kupën e Botës 2026. Anglia nis rrugëtimin e saj në Botëror n93daj Kroacisë dhe, sipas Collymore, thellësia e skuadrës mund të jetë një nga armët më të forta të anglezëve në garën për trofeun. Pas një sezoni fantastik me Bayern Munich, ku shënoi 61 gola, Kane pritet të udhëheqë sërish sulmin anglez. Nëse është në formë dhe i gatshëm, vendi i tij në formacion nuk vihet në diskutim. Megjithatë, kjo nuk do të thotë se lojtarë si Ollie Watkins, Anthony Gordon, Eberechi Eze, Noni Madueke apo Ivan Toney nuk do të kenë rëndësi. Collymore vlerësoi veçanërisht Watkins, i cili e mbylli sezonin në mënyrë të shkëlqyer me Aston Villan. “Në fund të sezonit ai ishte fantastik. Shënoi në ndeshje të mëdha, kundër Liverpoolit dhe Manchester Cityt, dhe tregoi se është në formën më të mirë. Mendoj se ai e kupton që në këtë Botëror do të ketë shumë mundësi të hyjë nga stoli dhe të luajë të paktën 30 minuta”, tha Collymore. Sipas tij, temperaturat e larta dhe intensiteti i ndeshjeve do ta detyrojnë Tuchelin të përdorë shpesh rezervat, duke u dhënë mundësi lojtarëve ofensivë të bëhen faktorë në momentet vendimtare. “Çdo sulmues dëshiron të luajë 90 minuta, por kur je në stol dhe sheh ndeshjen në temperatura të larta, mezi pret të futesh në lojë. Tridhjetë minuta janë më se të mjaftueshme për të lënë gjurmë”, shtoi ai. Ish-reprezentuesi anglez beson se Watkins, Gordon, Eze dhe Madueke mund të jenë “armët sekrete” të Anglisë në fazën eliminatore, kur ndeshjet shpesh vendosen nga një moment frymëzimi apo energjia e freskët që vjen nga stoli. “Thomas Tuchel ka folur shpesh për frymën e grupit. Nuk do të jenë vetëm 11 lojtarë që do ta fitojnë këtë Botëror, por të gjithë 26 futbollistët e skuadrës. Pikërisht këtu mund të bëhet diferenca”, theksoi Collymore. Nëse Anglia siguron kualifikimin nga grupi ndaj Kroacisë dhe Ganës, atëherë rëndësia e lojtarëve që vijnë nga stoli do të rritet edhe më shumë. Në fazat eliminatore, një asist, një gol apo një paraqitje e shkëlqyer prej 20-30 minutash mund të ndryshojë fatin e një kombëtareje. Për këtë arsye, edhe pse Harry Kane mbetet figura kryesore e sulmit anglez, lojtarët si Watkins dhe Gordon mund të jenë po aq të rëndësishëm në ëndrrën e Anglisë për të fituar Kupën e Botës.