McKenna rikthehet nga lëndimi për ndeshjen vendimtare të Skocisë në Botëror

Skocia ka marrë një lajm shumë të mirë para ndeshjes së rëndësishme ndaj Marokut në Kampionatin Botëror, pasi mbrojtësi Scott McKenna është rikthyer në stërvitje pas lëndimit. Ish-futbollisti i Aberdeenit dhe aktualisht pjesë e Dinamo e Zagrebit mungoi në fitoren 1:0 ndaj Haitit në ndeshjen hapëse për shkak të një problemi në pulpën e këmbës, i cili ia kishte penguar përgatitjet për turneun. Me rikthimin e 29-vjeçarit, përzgjedhësi Steve Clarke tashmë ka në dispozicion të gjithë futbollistët për ndeshjen e dytë në Grupin C, e cila zhvillohet të premten në mbrëmje në Boston. Maroku në takimin e parë barazoi 1:1 me Brazilin, ndërsa Skocia kryeson grupin me tri pikë pas fitores ndaj Haitit, edhe pse tifozët kishin shpresuar në një fitore më bindëse sa i përket golaverazhit. Skocia synon histori Skocia, që po merr pjesë në Kampionatin Botëror për herë të parë që nga viti 1998, synon të arrijë për herë të parë fazën eliminatore të një turneu të madh ndërkombëtar. Pas sfidës me Marokun, skocezët do të udhëtojnë drejt Miamit, ku më 24 qershor do të përballen me Brazilin në ndeshjen e fundit të grupit. Për të siguruar kualifikimin në mesin e 32 kombëtareve më të mira, skuadrës së Clarke me shumë gjasa do t’i duhet të shmangë humbjet e rënda në dy ndeshjet e mbetura. Edhe një pikë ndaj Marokut ose Brazilit do t’ia rriste ndjeshëm gjasat për të kaluar në fazën tjetër të garës.