Mesfushori i Anglisë, Declan Rice, ka zbuluar se prej më shumë se gjashtë muajsh po luan me një problem fizik që nuk ishte bërë publik, duke shpjeguar arsyen e zëvendësimit të tij në fitoren 4-2 ndaj Kroacisë në Kupën e Botës. Ylli i Arsenalit u largua nga fusha 18 minuta para përfundimit të ndeshjes, duke shkaktuar shqetësim te tifozët anglezë për një dëmtim të mundshëm.
Megjithatë, Rice ka sqaruar se bëhej fjalë për një masë paraprake. “Mendoj se ishte një vendim i zgjuar. Kam ndier disa shqetësime nervore në muskulin e pasmë të kofshës, një problem që po e menaxhoj që nga periudha pas Krishtlindjeve me Arsenalin. Shumë pak njerëz e dinin këtë, sepse gjithçka është trajtuar prapa skenave”, deklaroi ai për ITV Sport.
Rice shtoi se minutat e fundit të ndeshjeve janë zakonisht më të vështirat për trupin e një futbollisti dhe se stafi teknik vendosi të mos rrezikonte. Pavarësisht shqetësimeve fillestare, 27-vjeçari siguroi tifozët se është plotësisht gati për sfidën e radhës kundër Ganës. “Jam gati, jam në formë dhe mezi pres të luaj. Ditët e fundit jam ndier shumë mirë”, theksoi ai.
Mesfushori anglez foli edhe për gjendjen e bashkëlojtarit të tij te Arsenali, Bukayo Saka, i cili mungoi në ndeshjen hapëse për shkak të një problemi në tendinën e Akilit. “Pa dyshim që ai do të ketë rol të madh në këtë Botëror. Po e menaxhojmë në mënyrën e duhur. E kam parë te Arsenali sa shumë ka luajtur me këtë problem dhe mendoj se po veprojmë saktësisht si duhet ”, tha Rice.
Anglia do të përballet me Ganën në ndeshjen e dytë të Grupit L, ku një tjetër fitore do t’i afronte shumë “Tre Luanët” me kualifikimin në fazën eliminatore të Kupës së Botës.