Një zjarr i madh pranë bazës ushtarake kanadeze Wainwright, në provincën e Albertës, ka shkaktuar viktima dhe të lënduar, ka bërë të ditur ministri i Mbrojtjes i Kanadasë, David McGuinty, pa dhënë detaje për numrin e tyre. Forcat e Armatosura Kanadeze po bashkëpunojnë me autoritetet lokale për të menaxhuar situatën dhe për të hetuar shkaqet e zjarrit.
McGuinty e përshkroi gjendjen si “shumë, shumë aktive dhe delikate”. Kryeministri kanadez, Mark Carney, reagoi përmes një postimi në platformën X, duke e cilësuar ngjarjen si një “incident serioz që shkaktoi një zjarr të madh”. Ai shprehu mbështetjen për të gjithë personat e prekur nga ngjarja.
Zjarri shpërtheu pranë Bazës së Forcave Kanadeze Wainwright, një nga qendrat më të rëndësishme të stërvitjes ushtarake në vend. Sipas Korporatës Kanadeze të Transmetimeve (CBC), baza shërben si qendër kryesore për ushtrimet stërvitore me armë zjarri dhe zakonisht ka rreth 690 pjesëtarë të personelit ushtarak dhe 300 punonjës civilë në ditë, shkruan BBC.
Sipas Distriktit Bashkiak të Wainwright, zjarri u përhap me shpejtësi për shkak të erërave të forta dhe dëmtoi gardhet e bazës. Ministri McGuinty tha se nuk i kujtohej një incident i ngjashëm në vitet e fundit, ndërsa kryeministrja e Albertës, Danielle Smith, e cilësoi ngjarjen si një zjarr të madh dhe tragjik që po prek pjesëtarë të personelit ushtarak.
Autoritetet lokale u kanë bërë thirrje banorëve të shmangin zonën dhe t’u japin përparësi automjeteve të emergjencës. Ndërkohë, qeveritë e provincave fqinje kanë ofruar ndihmë për përballimin e situatës. Kryeministri i Saskaçevanit, Scott Moe, tha se ka vënë në dispozicion burime për të ndihmuar Albertën dhe se është i gatshëm të ofrojë mbështetje shtesë nëse kërkohet.
Edhe kryeministri i Kolumbisë Britanike, David Eby, bëri të ditur se qeveria e tij ka kontaktuar autoritetet e Albertës për të ofruar ndihmën e nevojshme. Shkaqet e zjarrit dhe numri i saktë i viktimave nuk janë bërë ende të ditura. Sinjali – aty ku e vërteta flet para lajmit!