Kryetari i Gjilanit, Alban Hyseni, ka njoftuar se të hënën në mëngjes do të thërrasë mbledhje urgjente të Këshillit Komunal për Siguri në Bashkësi, pas dy ngjarjeve tragjike që kanë ndodhur në këtë qytet.
Përmes një postimi në Facebook, Hyseni ka bërë të ditur se pas vrasjes së dyfishtë të së premtes, Gjilani është tronditur të dielën në mbrëmje edhe nga një incident tjetër me pasoja fatale. Ai u ka shprehur ngushëllime familjeve që humbën më të dashurit e tyre, ndërsa të lënduarve u ka uruar shërim të shpejtë.
Vrasja në Pogragjë të Gjilanit, policia jep detaje Hyseni ka theksuar se mbledhja urgjente do të mbahet në bashkëpunim me udhëheqjen e Policisë së Kosovës dhe organet e tjera përgjegjëse për rendin dhe ligjin, me qëllim të koordinimit të masave të menjëhershme për garantimin e sigurisë publike.
“Mbrojtja e jetës së qytetarëve tanë është prioriteti ynë kryesor institucional”, ka shkruar Hyseni. Ai ka shtuar se Komuna e Gjilanit do t’i shfrytëzojë të gjitha kompetencat e saj për të bashkëpunuar me organet e sigurisë në menaxhimin dhe parandalimin e rasteve të tilla.
Në fund, kryetari i Gjilanit u ka bërë thirrje qytetarëve për maturi, qetësi dhe bashkëpunim të plotë me organet e rendit.