Kryeministri izraelit Benjamin Netanyahu është takuar me pasagjerin Yaniv, i cili ndërhyri për të ndaluar incidentin e rëndë në avionin e kompanisë Flydubai, që po udhëtonte nga Dubai drejt Tel Avivit. Takimi u zhvillua në Aeroportin Ndërkombëtar Ben Gurion, pas kthimit të pasagjerëve në Izrael.
Në fotografitë e publikuara nga zyra e kryeministrit, Netanyahu shihet duke përqafuar Yanivin, ndërsa ky i fundit mban ende bluzën me njolla gjaku nga incidenti në avion. Sipas raportimeve, Yaniv dhe persona të tjerë që ndodheshin në bord ndërhynë pasi në kabinën e pilotëve shpërtheu një përleshje e dhunshme.
Pasagjerët ndihmuan në neutralizimin e personit që dyshohet se tentoi ta rrëzonte avionin. Gjatë takimit me Netanyahun, Yaniv tregoi se si kishte hyrë në kabinën e pilotëve dhe kishte parë personin e dyshuar pranë komandave të avionit. Ai shpjegoi se e kishte kapur dhe larguar nga komandat, ndërsa personat e tjerë në bord ndihmuan për të stabilizuar situatën.
Avioni, i cili kishte humbur me shpejtësi lartësi gjatë incidentit, u ul në mënyrë të sigurt në aeroportin e Tabukut, në Arabinë Saudite. Netanyahu ka falënderuar pasagjerët dhe anëtarët e ekuipazhit që ndërhynë, duke deklaruar se veprimet e tyre parandaluan një katastrofë me shumë viktima. Ndërkohë, autoritetet po hetojnë rrethanat e incidentit.
Zyrtarët izraelitë kanë ngritur dyshime për një sulm terrorist, por motivi ende nuk është konfirmuar përfundimisht. Kompania Flydubai ka konfirmuar incidentin dhe ka kërkuar që të priten rezultatet e hetimeve.