Agjencia Kadastrale e Kosovës ka njoftuar se nga 2 tetori 2026 do të nisë shikimi publik i të dhënave kadastrale në 115 zona kadastrale, në kuadër të Projektit për Rindërtimin e Kadastrit. Sipas njoftimit, procesi u mundëson qytetarëve të shikojnë dhe verifikojnë të dhënat kadastrale, në përputhje me procedurat e përcaktuara, si dhe të paraqesin vërejtjet eventuale.
Zonat kadastrale janë të ndara në pesë lote dhe përfshijnë komuna nga të gjitha rajonet e Kosovës. Në Lotin 1 janë përfshirë zona kadastrale në Deçan, Gjakovë, Istog, Klinë, Pejë dhe Rahovec. Loti 2 përfshin zona në Dragash, Ferizaj, Malishevë, Prizren, Shtërpcë, Shtime dhe Suharekë. Në Lotin 3 janë përfshirë Fushë Kosova, Gllogoci, Mitrovica, Skënderaj dhe Vushtrria.
Loti 4 përfshin Graçanicën, Lipjanin, Novobërdën, Obiliqin, Podujevën dhe Prishtinën, ndërsa në Lotin 5 janë përfshirë Gjilani, Hani i Elezit, Kaçaniku, Kamenica, Kllokoti, Parteshi, Ranillugu dhe Vitia.
Në kuadër të këtij procesi, qytetarët në zonat përkatëse do të kenë mundësi të kontrollojnë të dhënat që lidhen me pronat e tyre dhe të paraqesin vërejtjet eventuale sipas procedurave të përcaktuara.
Agjencia Kadastrale e Kosovës ka bërë të ditur se informimi më i detajuar për zhvillimin e shikimit publik do të bëhet në secilën zonë kadastrale përmes mediave lokale, posterëve dhe fletëpalosjeve. AKK u ka bërë thirrje qytetarëve që të marrin pjesë në këtë proces dhe ta shfrytëzojnë mundësinë për verifikimin e të dhënave kadastrale. / Telegrafi