Një devijim në rezultat mund të lidhet me gjendje krejt të ndryshme – dhe jo gjithmonë nënkupton të njëjtin problem Testi i hematokritit (Hct) është një analizë e thjeshtë gjaku që mat përqindjen e rruazave të kuqe të gjakut, ose eritrociteve, në vëllimin e përgjithshëm të gjakut.
Duke qenë se eritrocitet janë përgjegjëse për transportimin e oksigjenit në organizëm, mbajtja e tyre në nivele optimale është e rëndësishme për shëndetin. Ky test zakonisht bëhet si pjesë e hemogramit të plotë. Si kryhet testi i hematokritit dhe çfarë duhet të presim? Për testin e hematokritit nuk nevojitet përgatitje e veçantë.
Pacienti mund të hajë dhe të pijë normalisht, si dhe të marrë terapinë e rregullt. Mostra e gjakut merret zakonisht nga një venë e krahut, ndërsa te foshnjat mund të merret nga thembra. Procedura zgjat vetëm disa minuta. Më pas, mostra përpunohet në laborator për të përcaktuar përqindjen e saktë të eritrociteve.
Rezultatet zakonisht janë të gatshme brenda 24 orëve deri në disa ditë, varësisht nga laboratori, transmeton Telegrafi. Cilat janë vlerat referente të hematokritit? Rezultati i testit shprehet në përqindje.
Vlerat orientuese sipas moshës dhe gjinisë janë: Vlerat normale të hematokritit (%) Burrat: 41–50% Gratë: 36–44% Foshnjat: 32–42% Të porsalindurit: 45–61% Vlerat referente mund të ndryshojnë lehtë nga një laborator në tjetrin. Çfarë nënkuptojnë devijimet nga vlerat normale? 1. Hematokriti i lartë – eritrocitoza Niveli i lartë i hematokritit quhet eritrocitozë.
Në disa raste mund të lidhet me një sëmundje të quajtur policitemia vera. Megjithatë, shpesh rritja e hematokritit tregon se organizmi po prodhon më shumë rruaza të kuqe për shkak të nevojës së shtuar për oksigjen.
Shkaqet e mundshme përfshijnë: dehidratimin pirjen e duhanit qëndrimin në lartësi të mëdha mbidetare përdorimin e testosteronit apnenë obstruktive të gjumit sëmundjet e zemrës fibrozën pulmonare helmimin me monoksid karboni policiteminë vera, një sëmundje e rrallë e palcës së eshtrave. 2.
Hematokriti i ulët – anemia Hematokriti i ulët mund të tregojë se organizmi nuk ka mjaftueshëm rruaza të kuqe të shëndetshme. Një nga shkaqet më të zakonshme është anemia. Dyshimi për anemi, e cila mund të shkaktojë simptoma si lodhje, dobësi dhe mungesë energjie, është ndër arsyet më të shpeshta për kontrollimin e hematokritit.
Shkaqet e mundshme përfshijnë: humbjen e gjakut, kronike ose akute forma të ndryshme të anemisë sëmundjet e veshkave ose të gjëndrës tiroide leukeminë hiponatreminë. Gjatë shtatzënisë është normale që hematokriti të jetë disi më i ulët , sepse vëllimi i plazmës së gjakut, pra pjesës së lëngshme të tij, rritet më shumë sesa numri i eritrociteve.