Britney Spears ka folur hapur për pasojat emocionale të periudhës 13-vjeçare kur ishte nën kujdestari gjyqësore, duke thënë se ende beson se njerëzit nuk e kuptojnë plotësisht dëmin që ajo pësoi gjatë asaj kohe.
Këngëtarja 44-vjeçare e bëri këtë të ditur përmes disa postimeve në Instagram, ku rikujtoi vitet e vështira të jetës së saj dhe mënyrën se si ato ndikuan në personalitetin dhe marrëdhëniet e saj me të tjerët. Spears tha se kujdestaria i shkaktoi dëme të thella emocionale, duke theksuar se “zemra dhe shpirti” i saj u prekën rëndë.
Ajo kujtoi gjithashtu se gjatë asaj periudhe ndihej sikur ishte bërë një “robot” ose “makinë”. Këngëtarja rrëfeu se në fillimet e karrierës ishte shumë e turpshme dhe se takimet me grupe të mëdha njerëzish i shkaktonin ankth, deri në atë pikë sa kishte episode ku dridhej dhe kishte vështirësi në frymëmarrje.
Pavarësisht kësaj, Spears tha se në skenë arrinte të shndërrohej në një person tjetër dhe të performonte para mijëra njerëzve. Kujdestaria gjyqësore ndaj saj nisi në vitin 2008 dhe përfundoi në nëntor të vitit 2021, pas një beteje të gjatë ligjore për rikthimin e kontrollit mbi jetën dhe vendimet e saj personale. Në postimet e fundit, Spears ka folur edhe për jetën e saj sentimentale.
Ajo ka bërë të ditur se aktualisht është beqare, rreth dy vjet pas ndarjes dhe divorcit nga Sam Asghari. Divorci i tyre u finalizua në vitin 2024, pasi çifti ishte martuar në vitin 2022. Spears, e cila prej vitesh ka folur publikisht për përvojat e saj gjatë kujdestarisë, duket se vazhdon të reflektojë mbi ndikimin që ajo periudhë pati në jetën dhe identitetin e saj.
Sinjali – aty ku e vërteta flet para lajmit!