Si duhet të flejë një bebe gjatë natës? Përgjigjja lidhet jo vetëm me qetësinë e foshnjës, por edhe me sigurinë e saj. Ekspertët rekomandojnë që prindërit të jenë pranë foshnjës gjatë natës, por hapësira e gjumit të jetë e veçantë. Dr. David R.
Samson, profesor i asociuar i antropologjisë evolucionare në Universitetin e Torontos, sjell si shembull nënat Hadza në Tanzani, për të cilat gjumi larg foshnjës është diçka e pazakontë. Në shumë kultura, foshnjat kanë fjetur pranë kujdestarëve, duke krijuar mundësi për reagim të shpejtë ndaj zgjimeve dhe nevojave të tyre gjatë natës.
Por afërsia nuk do të thotë domosdoshmërisht i njëjti shtrat. Sipas rekomandimeve të Akademisë Amerikane të Pediatrisë, foshnja duhet të flejë në shpinë, mbi një sipërfaqe të fortë, të sheshtë dhe të veçantë. Ajo rekomandohet të jetë në të njëjtën dhomë me prindërit, veçanërisht në muajt e parë, por jo në të njëjtin shtrat. Kur rritet rreziku?
Sipas të dhënave të cituara nga Samson, gjatë vitit 2024 në SHBA u regjistruan rreth 3,400 vdekje foshnjash. Prej tyre, 1,351 u klasifikuan si sindromë e vdekjes së papritur të foshnjës, 1,099 si vdekje me shkak të panjohur dhe 947 si mbytje aksidentale në shtrat. Rreziku bëhet më i madh kur foshnja fle në sipërfaqe të buta, si divane dhe kolltuqe.
Situata bëhet veçanërisht e rrezikshme kur prindi ka konsumuar alkool, ka marrë substanca ose medikamente që shkaktojnë përgjumje, pi duhan apo është shumë i lodhur. Foshnjat nën katër muaj, ato të lindura para kohe dhe foshnjat me peshë të ulët në lindje konsiderohen më të rrezikuara.
Gjidhënia sjell një tjetër sfidë Ushqyerja me gji lidhet me uljen e rrezikut të vdekjes së papritur të foshnjës, por zgjimet e shpeshta gjatë natës mund të shtojnë lodhjen e nënës. Në këto kushte, ajo mund të bjerë në gjumë pa dashje ndërsa ushqen ose mban foshnjën.
Për këtë arsye, në disa vende përdoret edhe qasja e reduktimit të dëmit, me këshilla praktike për prindërit që mund të përfundojnë duke ndarë shtratin me foshnjën. Në Zelandën e Re janë promovuar alternativa që ruajnë afërsinë mes prindit dhe foshnjës, por sigurojnë një sipërfaqe të veçantë gjumi, përfshirë djepin tradicional Maori dhe shtretër portativë të përshtatur për foshnjat.
Këshilla kryesore është e thjeshtë: foshnja pranë prindërve, në të njëjtën dhomë, por në hapësirën e saj të gjumit.