David Beckham po fillon të ndërtojë ngadalë një perandori të tijën me klube futbolli dhe mund të jetë pranë shtimit të një tjetër skuadre në portofolin e tij, i cili aktualisht përfshin dy klube. Ish-ylli i Manchester Unitedit është tashmë pronar i Inter Miamit në MLS dhe bashkëpronar i skuadrës së League 2, Salford City.
Beckham e nisi procesin e pronësisë së klubeve të futbollit pasi ushtroi opsionin për të blerë një ekip të ri në MLS në shkurt të vitit 2014. Ky opsion ishte pjesë e marrëveshjes që ai kishte arritur kur nënshkroi kontratën me LA Galaxy në vitin 2007. Kështu lindi Inter Miami, me klubin që bëri debutimin në MLS më , duke pësuar humbje 1-0 në transfertë ndaj Los Angeles.
Ndërkohë, në janar të vitit 2019, u bë e ditur se Beckham dhe ish-bashkëlojtarët e tij nga “Class of ’92” u bënë bashkëpronarë të klubit anglez Salford City, duke marrë 10 për qind të aksioneve. Megjithatë, në maj të vitit 2025, Beckham dhe Gary Neville udhëhoqën një konsorcium të ri që mori kontrollin e Salfordit.
Tani duket se Beckham po tenton të blejë një tjetër klub historik, këtë herë në Francë, nëse raportimet e “Ouest-France” rezultojnë të sakta. Mediumi francez ka raportuar se Beckham dyshohet se është i përfshirë në një ofertë për blerjen e klubit të Ligue 2, FC Nantes, i cili aktualisht po kalon një situatë të vështirë sportive.
Nantes ndodhet në fund të tabelës pasi ka humbur tri ndeshjet e para të kampionatit, pas rënies nga Ligue 1. Nantes është një klub historik në Francë, me tetë tituj të Ligue 1, dhe kjo mund të jetë arsyeja pse Beckham dhe grupi i tij janë të interesuar për klubin.
Ata besohet se e shohin si një projekt për ta rikthyer një klub të madh në nivelet e tij të dikurshme dhe për t’i sjellë suksese të reja në të ardhmen. Raportohet se Nantes ka pranuar të paktën tri oferta për blerjen e klubit.
Dy prej tyre janë të lidhura me fonde me bazë në Britani, ndërsa mediumi francez pretendon se emri i pronarëve të Inter Miamit po përmendet vazhdimisht në diskutime të nivelit të lartë. Pronari i “Les Canaris”, biznesmeni polak Waldemar Kita, besohet se është i gatshëm ta shesë klubin.
Ai e bleu Nantesin në vitin 2007 dhe gjatë periudhës së tij si pronar, situata nuk ka qenë aspak e këndshme për tifozët. Klubi ka rënë dy herë nga Ligue 1, ndërsa në 19 vite ka pasur plot 24 trajnerë. Kita dhe djali i tij, Franck, i cili është drejtor ekzekutiv i klubit, janë gjithashtu figura jo shumë të pëlqyera nga tifozët.