Tadej Pogaçar triumfoi në etapën e gjashtë të Vueltës së Spanjës 2026, duke mposhtur në sprint Enrik Masin pas një gare spektakolare në Kastejon. Slloveni konfirmoi edhe një herë dominimin e tij, duke regjistruar fitoren e tretë të UAE Team Emirates në këtë edicion të garës.
Megjithatë, vëmendjen më të madhe e mori paraqitja e Enrik Masit, i cili tregoi versionin e tij më të mirë të dy sezoneve të fundit. Gara u zhvillua nën një vapë të fortë në Komunitetin Valencian. Shkëputja e ditës përfshiu 16 çiklistë, mes tyre Van Aert, Buitrago, Pelo Bilbao dhe Benet, por skuadra UAE kontrolloi garën dhe e neutralizoi atë përpara pjesës vendimtare.
Në ngjitjen e El Bartolo, Pogaçari nisi sulmin e tij dhe grupi i favoritëve u shpërbë. Gal u shkëput, ndërsa Mas, Karapaz dhe Onlei arritën t’i rezistonin ritmit të sllovenit. Mas shfrytëzoi dobësinë e Onleit dhe iu përgjigj sulmit të Pogaçarit. Ai arriti të lidhej me sllovenin dhe madje kaloi i pari në majën e ngjitjes. Dy rivalët zhvilluan më pas një zbritje shumë të shpejtë.
Pogaçari pati edhe një moment rreziku kur doli gjatë në një kthesë dhe u detyrua të zbriste nga biçikleta për të shmangur rrëzimin. Në kilometrat e fundit, Mas nuk u kursye dhe kontribuoi në ndjekje së bashku me Gal, Rogliç, Karapaz dhe Debruine . Megjithatë, në sprint Pogaçari tregoi edhe një herë superioritetin e tij.
Me këtë fitore, Pogaçari forcon pozitat në krye të klasifikimit të përgjithshëm. Ai do të hyjë në etapën e ardhshme malore drejt Valdelinares me 3’34” avantazh ndaj Enrik Masit. Edhe pse Vuelta duket gjithnjë e më shumë nën kontrollin e sllovenit, paraqitja e Masit ishte një sinjal i rëndësishëm.
Lideri i skuadrës Movistar tregoi se është rikthyer në nivelin më të lartë dhe se mund të luftojë me më të mirët. Pogaçari fitoi etapën, por Mas fitoi diçka po aq të rëndësishme: besimin se mund të jetë sërish protagonist.