Juventusi ka marrë një lajm shqetësues pas fitores në ndeshjen e parë të sezonit të ri në Serie A, pasi sulmuesi turk Kenan Yildiz ka pësuar një lëndim në këmbë. Sipas “La Gazzetta dello Sport” dhe raportimeve të tjera nga Italia, Yildiz iu nënshtrua kontrolleve mjekësore të hënën në qendrën stërvitore të Juventusit në Torino.
Rezultatet kanë ngritur shqetësime dhe turku mund të qëndrojë jashtë fushave për rreth dy muaj. Mediat italiane raportojnë gjithashtu se nuk përjashtohet mundësia që Yildiz t’i nënshtrohet një ndërhyrjeje kirurgjikale për trajtimin e dëmtimit. Lëndimi i fundit është i ndryshëm nga problemet e përsëritura në gju, të cilat e kishin shqetësuar 21-vjeçarin në fund të sezonit të kaluar.
Yildiz ishte në dispozicion të trajnerit Luciano Spalletti për ndeshjen e parë të Juventusit në Serie A, ku “Zonja e Vjetër” fitoi 1-0 në udhëtim ndaj Frosinones, skuadrës së sapopromovuar në elitën e futbollit italian. Nëse mungesa e tij konfirmohet, Juventusi rrezikon të mbetet pa një prej lojtarëve më të rëndësishëm të skuadrës gjatë javëve të para të sezonit.
Megjithatë, klubi torinez nuk pritet të rikthehet në tregun e transferimeve për të gjetur një zëvendësues direkt për Yildizin. Spalletti ka në dispozicion Jeremie Boga dhe përforcimin e ri Kerim Alajbegovic, ndërsa pjesë e skuadrës vazhdon të jetë edhe Nico Gonzalez, i cili sezonin e kaluar ishte i huazuar te Atletico Madridi. Sinjali – aty ku e vërteta flet para lajmit!