Topi me të cilin Diego Maradona shënoi golin e famshëm me dorë ndaj Anglisë në Kupën e Botës 1986 është shitur në ankand për 2.9 milionë euro. Maradona e përdori topin Adidas Azteca për të shënuar golin e parë në fitoren 2:1 të Argjentinës ndaj Anglisë në çerekfinale, në një moment që hyri në historinë e futbollit si “Dora e Zotit”.
Në të njëjtën ndeshje, Maradona shënoi edhe një tjetër gol legjendar, të cilësuar më vonë si “Goli i Shekullit”, pasi dribloi pesë futbollistë anglezë. Topi u shit për 3.3 milionë dollarë, rreth 2.9 milionë euro, në ankandin e Heritage Auctions në Shtetet e Bashkuara.
Ai ishte ruajtur për më shumë se tri dekada nga gjyqtari tunizian Ali Bin Nasser, i cili e kishte marrë me vete pas përfundimit të ndeshjes. Autenticiteti i topit është konfirmuar edhe përmes verifikimeve të pavarura. Shuma e arritur megjithatë ishte dukshëm më e ulët se parashikimet, pasi pritej që topi të shitej për rreth 10 milionë dollarë.
Ndërkohë, fanella që Maradona kishte veshur në atë ndeshje ishte shitur në vitin 2022 për 8.3 milionë euro. Sinjali – aty ku e vërteta flet para lajmit!