Aktorja amerikane, Gwyneth Paltrow, është përfshirë në një valë kritikash në rrjetet sociale pas publikimit të një ftese që pretendohet se lidhet me një darkë private në shtëpinë e saj në Hamptons, në nder të Sam Altman, CEO i OpenAI. Lajmi u bë publik nga gazetari Matthew Belloni përmes ‘Puck’.
Ai publikoi edhe një grafikë që dukej si një ftesë zyrtare, ku shkruhej se bëhej fjalë për një ‘darkë private në ambient të hapur në shtëpinë e saj, në nder të Sam Altman’. Postimi u përhap shpejt në rrjetet sociale dhe shkaktoi reagime të shumta. Disa përdorues në X e kritikuan ashpër Paltrow, duke e cilësuar si ‘plotësisht të shkëputur nga realiteti’.
Komediani dhe aktivisti, Matt Bernstein shkoi edhe më tej, duke e lidhur afrimin e Paltrow me botën e inteligjencës artificiale me atë që ai e quajti ‘teknofashizëm’. Paltrow reagoi ndaj kritikave më 20 gusht përmes Instagramit, por në vend që t’u përgjigjej drejtpërdrejt, vendosi ta trajtonte situatën me humor.
Ajo publikoi disa versione parodike të ftesës, në të cilat si të ftuar nderi shfaqeshin personazhe imagjinare, mes tyre M3GAN, Samantha Jones dhe Shrek. Ndërsa historia vazhdonte të përhapej, nisën të shfaqeshin edhe dyshime nëse ftesa ishte e vërtetë. Për momentin, pretendimi për darkën nuk është konfirmuar publikisht nga Paltrow apo Altman.
Kjo nuk është hera e parë që Gwyneth Paltrow bëhet pjesë e historive virale që lidhen me industrinë e teknologjisë. Vitin e kaluar, ajo u shfaq në një reklamë të kompanisë Astronomer, pasi një video e regjistruar në një koncert të Coldplay shkaktoi vëmendje të madhe për shkak të drejtuesve të kompanisë.