Në vitin 1978, një burrë 61-vjeçar u gjet i vrarë me thikë në banesën e tij në Omaha të Nebraskës. Por vrasësi nuk u mjaftua vetëm me krimin. Para se të largohej, ai la pas një shënim provokues për hetuesit, duke pretenduar se po largohej nga vendi i krimit me vetëm një të dhënë. Ishte një sfidë e drejtpërdrejtë për policinë: gjejeni vetë.
Hetuesit gjetën gjurmë gishtërinjsh dhe pëllëmbësh në banesë, ndërsa vetura e viktimës u gjet më vonë në Illinois. Megjithatë, pavarësisht provave, identiteti i vrasësit mbeti mister. Rasti u ftoh. Për rreth 30 vjet, askush nuk e dinte se kush e kishte vrarë Carroll Bonnet. Më pas, teknologjia e re për krahasimin e gjurmëve të gishtërinjve solli një kthesë të papritur.
Një nga gjurmët e ruajtura për dekada u lidh me një të dyshuar: Jerry Watson . Por misteri i “shenjës” që kishte lënë vrasësi ende nuk ishte zbërthyer plotësisht. Kur hetuesit filluan të rishikonin sërish provat e vjetra, ata vunë re një detaj në një nga gazetat e mbledhura nga vendi i krimit.
Në skajin e saj ishte shkruar me dorë: “Jerry W.” Pikërisht emri i personit që ishte identifikuar vite më vonë përmes gjurmëve. Pas dekadash mister, shenja që vrasësi kishte lënë si sfidë për hetuesit kishte qenë aty gjatë gjithë kohës. Në vitin 2011, Jerry Watson u shpall fajtor për vrasje të shkallës së parë dhe u dënua me burgim të përjetshëm.
Rasti, i cili kishte qëndruar i pazgjidhur për më shumë se tri dekada, u zbërthye falë teknologjisë moderne, provave të ruajtura dhe një detaji të vogël që për vite kishte mbetur i fshehur në dosjen e vjetër të krimit. Sinjali – aty ku e vërteta flet para lajmit!