Presidenti amerikan Donald Trump tha se salla e re e vallëzimit që po ndërtohet në Shtëpinë e Bardhë do të kushtojë afro 400 milionë dollarë dhe se projekti do të financohet tërësisht nga donatorë privatë dhe kompani. “Po shpenzojmë qindra miliona dollarë për sallën e vallëzimit dhe të gjitha paratë vijnë nga njerëz si unë dhe kompani të mëdha që po kontribuojnë”, tha Trump.
Ai shtoi se projekti “nuk do të financohet aspak nga taksapaguesit”. Ndërkohë, Gjykata Supreme e SHBA-së ka lejuar përkohësisht vazhdimin e punimeve, vetëm disa orë para se vendimet e gjykatave më të ulëta të hynin në fuqi dhe të ndalonin punimet mbi tokë për shkak të mungesës së miratimit nga Kongresi.
Trump e mirëpriti vendimin e Gjykatës Supreme gjatë një paraqitjeje politike në Karolinën e Jugut, duke thënë se nëse gjykata thotë të vazhdohet, “kjo është gjë e mirë”. Çështja është bërë pjesë e një debati më të gjerë mbi kufijtë e pushtetit të presidentit amerikan.
Administrata Trump argumenton se presidenti ka autoritet të gjerë për të ndryshuar Shtëpinë e Bardhë dhe prona të tjera federale, ndërsa e justifikon vazhdimin e projektit edhe me arsye të sigurisë kombëtare.
National Trust for Historic Preservation, organizata që mbron trashëgiminë historike, kundërshton projektin dhe argumenton se presidenti nuk ka kompetencë ta realizojë atë në mënyrë të njëanshme, veçanërisht pasi projekti përfshin shembjen e Krahut Lindor të Shtëpisë së Bardhë.