FC Ballkani ka zyrtarizuar rikthimin e sulmuesit Jetmir Topalli, i cili do ta veshë sërish fanellën e klubit nga Suhareka pas gjashtë vitesh karrierë ndërkombëtare. Klubi ka bërë të ditur se Topalli ka nënshkruar marrëveshjen dhe do t’i bashkohet skuadrës për kapitullin e ri të karrierës së tij.
Rikthimi i tij konsiderohet një përforcim i rëndësishëm për Ballkanin, me sulmuesin që vjen me përvojë të konsiderueshme të fituar gjatë viteve të fundit jashtë Kosovës. Topalli rikthehet në një ambient që e njeh mirë dhe ku kishte spikatur para se të vazhdonte karrierën ndërkombëtare. “Pas gjashtë viteve të karrierës ndërkombëtare, rikthehet aty ku ndihet si në shtëpi.
Tani është koha për një kapitull të ri, këtë herë sërish me fanellën e Ballkanit”, thuhet në njoftimin e klubit. Me afrimin e Topallit, Ballkani synon të shtojë më shumë cilësi dhe eksperiencë në repartin ofensiv për sfidat e sezonit të ri.