Shtetet e Bashkuara kanë vendosur një tjetër paketë sanksionesh ndaj zyrtarëve dhe kompanive kubaneze, sipas një njoftimi të Sekretarit amerikan të Shtetit, Marco Rubio.
Në paketën e fundit të sanksioneve ekonomike janë përfshirë nëntë kompani shtetërore të sektorëve të minierave, metalurgjisë dhe ndërtimit, si edhe Ministria e Ndërtimit dhe disa zyrtarë të lidhur me një institut ndërkombëtar me bazë në Kubë.
Rubio akuzoi disa prej personave të përfshirë se po “sjellin një brigadë të re simpatizantësh ndërkombëtarë në Havana për t’u lidhur me zyrtarë të regjimit”, në kuadër të aktiviteteve që përkojnë me 100-vjetorin e lindjes së ish-udhëheqësit kuban Fidel Castro.
Kuba i ka dënuar të gjitha sanksionet e vendosura nga administrata Trump, të cilat janë pjesë e një fushate më të gjerë presioni ndaj udhëheqjes së ishullit të Karaibeve.
Në një deklaratë, Rubio tha se personat dhe institucionet e shënjestruara nga sanksionet janë pjesë e asaj që ai e përshkroi si arsyen e ekzistencës së regjimit për të eksportuar marksizmin, pakënaqësinë racore dhe dhunën komuniste në mbarë botën.
“Sanksionet e shpallura sot e bëjnë të qartë se administrata Trump nuk do të tolerojë përpjekjet e regjimit kuban për të financuar represionin e tij apo për të vazhduar fushatën e tij shumëvjeçare të aktiviteteve subversive kundër Shteteve të Bashkuara” , vijoi ai.
Ministri i Jashtëm kuban, Bruno Rodríguez, e dënoi njoftimin e Rubios nëpërmjet një postimi në X ku u shpreh se Rubio po përpiqej të “ndëshkonte” kompanitë kubaneze dhe të dëmtonte më tej ekonominë e vendit. Ai shtoi se këto masa do ta pengonin qeverinë t’u garantojë shërbimet bazë qytetarëve, të cilët, sipas tij, ndodhen tashmë në një situatë kritike si pasojë e bllokadës ekonomike.
Zyrtarë të lartë kubanë në sektorët e energjisë, financave dhe mbrojtjes i nënshtrohen tashmë sanksioneve amerikane. Sanksionet amerikane, së bashku me një bllokadë efektive të importeve të naftës, kanë përkeqësuar mungesat ekzistuese në Kubë, veçanërisht të karburantit, ilaçeve dhe ushqimeve.
Infrastruktura e vjetër e sistemit elektrik të ishullit varet në masë të madhe nga importet e karburantit. Për këtë arsye, spitalet janë detyruar të përdorin gjeneratorë emergjence, ndërsa qytetarët janë përballur me ndërprerje të shpeshta të energjisë.
Administrata Trump ka ndërmarrë masa edhe ndaj sektorit të turizmit të Kubës, i cili është një burim i rëndësishëm të ardhurash për qeverinë kubaneze. Këto masa kanë kontribuar në uljen e numrit të vizitorëve në ishull.