NATO ka reaguar pas raportimeve se Irani ka shqyrtuar mundësinë e goditjes së objektivave ushtarake amerikane në Evropën Jugore dhe Juglindore në rast të një përshkallëzimi të mëtejshëm të konfliktit me Shtetet e Bashkuara. Një zyrtar i NATO-s deklaroi se Aleanca është e përgatitur të përballet me çdo kërcënim dhe se do të bëjë gjithçka që është e nevojshme për mbrojtjen e vendeve anëtare.
“Siç u dëshmua në fillim të këtij viti, kur mbrojtja ajrore e NATO-s interceptoi me sukses në katër raste të veçanta raketa balistike të ardhura nga Irani drejt Turqisë, kapaciteti ynë i parandalimit dhe mbrojtjes është i fortë dhe efektiv.
NATO është e gatshme të përballet me çdo kërcënim dhe do të bëjë gjithmonë gjithçka që është e nevojshme për të mbrojtur të gjithë aleatët”, deklaroi zyrtari i Aleancës.
Reagimi i NATO-s vjen pasi “Financial Times” raportoi se forcat iraniane kanë analizuar skenarë për sulme të mundshme ndaj aseteve ushtarake amerikane në Evropë nëse Presidenti amerikan Donald Trump vendos të përshkallëzojë konfliktin me Teheranin. Gazeta britanike e bazoi raportimin te dy persona të afërt me regjimin iranian.
Sipas “Financial Times”, ndër vendet e shqyrtuara ndodhet Bullgaria, ku muajin e kaluar autoritetet lejuan përdorimin e bazës ajrore Bezmer për furnizimin në ajër të avionëve ushtarakë amerikanë. Në skenarët e shqyrtuar nga Teherani është përmendur edhe Qiproja. Raportimi nuk thotë se Irani ka marrë një vendim për të kryer sulme të tilla.
Bëhet fjalë për objektiva që, sipas burimeve të “Financial Times”, janë analizuar nga forcat iraniane si pjesë e skenarëve të mundshëm të kundërpërgjigjes nëse konflikti me Uashingtonin zgjerohet. Paralajmërimi i NATO-s merr peshë të veçantë për shkak të episodeve të mëparshme në territorin e Turqisë, një vend anëtar i Aleancës.
Gjatë muajit mars, sistemet e mbrojtjes së NATO-s interceptuan katër raketa balistike të ardhura nga Irani që hynë në hapësirën ajrore turke. Autoritetet turke protestuan ndaj Teheranit dhe paralajmëruan se do të merrnin masa ndaj çdo kërcënimi për territorin e vendit.
Në atë periudhë NATO forcoi gjithashtu mbrojtjen ajrore në jug të Turqisë, përfshirë vendosjen e kapaciteteve shtesë Patriot. Episodet treguan se Aleanca kishte kaluar nga monitorimi i rrezikut te përdorimi konkret i sistemeve të saj mbrojtëse për të neutralizuar kërcënimet ajrore.
Deklarata e fundit e NATO-s nuk përmban një kërcënim specifik për kundërpërgjigje ndaj Iranit dhe as nuk përmend aktivizimin e mekanizmave të mbrojtjes kolektive. Mesazhi i Aleancës përqendrohet te gatishmëria ushtarake dhe te angazhimi për të mbrojtur territorin e vendeve anëtare nëse kërcënimet do të materializoheshin.
Situata ka marrë një dimension më të gjerë evropian pikërisht për shkak të raportimeve se Teherani po shqyrton objektiva jashtë Lindjes së Mesme. “Financial Times” raportoi se Irani po studion edhe forma të tjera presioni në rast përshkallëzimi, ndërsa linja e Teheranit është ashpërsuar pas tensioneve të fundit me Uashingtonin.
Për momentin, nuk ka konfirmim publik nga autoritetet iraniane se është miratuar një plan për sulme ndaj objektivave amerikane në Evropë. Megjithatë, reagimi i NATO-s tregon se Aleanca po i trajton seriozisht raportimet dhe po thekson gatishmërinë e saj për të mbrojtur çdo vend anëtar në rast të një kërcënimi ushtarak.