Reperi Kanye West, i njohur tashmë si Ye, do të performojë në Shën Petersburg të Rusisë në muajin tetor, ku do të mbajë dy koncerte në stadiumin “Gazprom Arena”. Biletat për stadiumin me rreth 70 mijë vende u shitën brenda pak orësh nga njoftimi i koncerteve. Çmimet varionin nga rreth 78 deri në 1,394 euro.
Koncertet e Westit pritet të jenë ndër performancat më të mëdha të një artisti perëndimor në Rusi që nga nisja e pushtimit të Ukrainës në vitin 2022. Performancat vijnë në një periudhë kur West po përpiqet të përmirësojë imazhin e tij publik, pas disa vitesh të shoqëruara me deklarata antisemitike dhe pro-naziste.
Në muajin janar, reperi kërkoi falje publikisht për deklaratat e tij dhe tha se kishte kaluar një periudhë të vështirë të shëndetit të tij mendor. “Nuk jam nazist dhe nuk jam antisemit”, ka shkruar ai në një deklaratë publike.
West ka thënë gjithashtu se kishte kaluar një periudhë prej rreth katër muajsh me “sjellje maniake, psikotike, paranojake dhe impulsive” dhe se ishte “thellësisht i turpëruar” për veprimet e tij. Deklaratat e tij kanë shkaktuar pasoja të mëdha në karrierë. Kompani të mëdha si “Adidas” dhe “Balenciaga” ndërprenë bashkëpunimin me të, ndërsa disa koncerte të turneut të tij evropian u anuluan.
Në Britani të Madhe, Westit iu mohua hyrja në vend, ndërsa festivali “Wireless”, ku ai ishte planifikuar të ishte performuesi kryesor, u anulua. Koncertet e tij u anuluan gjithashtu në Francë, Poloni, Itali dhe Çeki. Ndërkohë, performancat në Spanjë, Portugali, Holandë, Turqi dhe Shqipëri u zhvilluan.
Në Rusi, situata është ndryshe Artistët e mëdhenj perëndimorë janë bërë shumë më të rrallë në Rusi që nga nisja e luftës në Ukrainë. Para vitit 2022, në Rusi kishin performuar emra të njohur si Red Hot Chili Peppers, Lana Del Rey, Muse dhe System of a Down.
Pas pushtimit të Ukrainës, shumë kompani diskografike pezulluan aktivitetet e tyre në Rusi, ndërsa shumica e artistëve të mëdhenj perëndimorë u larguan nga tregu. Në këtë kontekst, performanca e Westit në Rusi përbën një ngjarje të veçantë për skenën muzikore të vendit. Vendimi i reperit për të performuar në Rusi ka shkaktuar edhe kritika.
Deputeti nacionalist rus Vitaly Milonov ka sugjeruar që West të këndojë këngë tradicionale ruse në vend të repertorit të tij. “Ndoshta pas kësaj do t’i japë fund sjelljeve të tij të neveritshme dhe do të bëhet një njeri normal”, ka thënë Milonov. Ndërkohë, koncertet e Westit në Evropë kanë marrë reagime të përziera.
Në Madrid, ku performoi këtë muaj, një pjesë e konsiderueshme e publikut ishte nga jashtë dhe kishte udhëtuar për ta parë reperin, pasi koncertet e tij ishin anuluar në vendet e tyre. West ka performuar edhe në Tiranë më 11 korrik. Sinjali – aty ku e vërteta flet para lajmit!