Ish-Zonja e Parë e SHBA-së, Jill Biden, ka treguar se i drejtohet në lutje djalit të saj të ndjerë, Beau Biden, ndërsa familja po përballet me betejën shëndetësore të ish-presidentit amerikan Joe Biden, i cili është diagnostikuar me një formë agresive të kancerit të prostatës.
Në një intervistë të publikuar të hënën në podcastin “The Jamie Kern Lima Show”, Jill Biden ka folur emocionalisht për djalin e saj Beau, i cili vdiq në vitin 2015, në moshën 46-vjeçare, pas një beteje me kancerin në tru. “Unë i lutem Beau-t dhe mendoj se ai më dëgjon. Tani, me diagnozën e kancerit të Joe-t, ndihem pak e dëshpëruar dhe them: ‘Beau, ku je?
Kam nevojë për ty’”, ka rrëfyer Jill Biden. Ajo ka treguar edhe për momentet e fundit të jetës së Beau-t dhe për mënyrën se si u përball me besimin gjatë asaj periudhe. Jill tha se në atë kohë i ishte lutur Zotit që ta merrte atë në vend të djalit të saj.
“Vazhdoja të lutesha dhe të thosha: ‘Më merr mua’”, ka treguar ajo, duke shtuar se nuk e kishte humbur kurrë shpresën deri në momentin kur Beau dha frymën e fundit. Sa i përket gjendjes së Joe Bidenit, Jill Biden kishte deklaruar në qershor se kanceri i ish-presidentit ishte përhapur në eshtra. Gjatë intervistës, ajo foli edhe për djalin tjetër, Hunter Biden, dhe betejën e tij me varësinë.
Jill tha se tani është “koha e Hunterit të shkëlqejë”, duke vlerësuar faktin se ai ka folur publikisht për përvojat e tij dhe rikuperimin. Hunter Biden ishte shpallur fajtor për tri akuza federale lidhur me armëmbajtjen, rast që lidhej me blerjen dhe posedimin e një arme gjatë kohës kur përdorte narkotikë.
Më vonë, ai ka folur hapur për betejën me varësinë dhe rikuperimin, duke përdorur përvojën e tij për të inkurajuar të tjerët të kërkojnë ndihmë. Sinjali – aty ku e vërteta flet para lajmit!