Portieri i dikurshëm i Aston Villas, Arsenalit dhe Manchester Unitedit, Jimmy Rimmer, ka ndërruar jetë në moshën 78-vjeçare. Rimmer ishte titullar në të gjithë sezonin kur Aston Villa fitoi titullin kampion në vitin 1981 dhe një vit më pas e nisi si titullar finalen e Kupës së Evropës, ku “Villans” mposhtën Bayern Munichun 1-0 në Roterdam.
Aston Villa njoftoi se klubi ishte “thellësisht i pikëlluar” nga lajmi për vdekjen e tij. Klubi deklaroi: “Rimmer ishte një nga portierët më të mirë të gjeneratës së tij dhe ndoshta një nga më të pafatët kur bëhej fjalë për ndeshjet e mëdha. Pavarësisht se fitoi dy medalje si kampion i Kupës së Evropës, ai nuk ishte në fushë në fund të asnjërës prej finaleve.
Ai ishte në bankinë në Wembley në vitin 1968, kur Manchester United mposhti Benficën 4-1, ndërsa në vitin 1982 luajti vetëm nëntë minuta për Aston Villan kundër Bayern Munichut, para se një dëmtim në qafë ta detyronte të zëvendësohej nga Nigel Spink në Roterdam.” “Rimmer ishte me lot në sy në dhomën e zhveshjes, ndërsa po merrte trajtim nga mjeku i klubit, David Targett.
Megjithatë, ai u rikthye në stol në kohë për të parë golin e fitores të Peter Withe dhe për t’iu bashkuar festimeve pas ndeshjes. “Pavarësisht kësaj, ai ishte një nga vetëm pesë lojtarët e Aston Villas që u përfshinë në formacionin titullar në të nëntë ndeshjet tona të Kupës së Evropës atë sezon.
Ai gjithashtu kishte qenë një nga shtatë lojtarët që luajtën në të gjitha ndeshjet gjatë sezonit 1980-81, kur klubi fitoi titullin.” Në fund të deklaratës, Aston Villa shtoi: “Mendimet e të gjithëve në klub janë me familjen dhe miqtë e Jimmyt në këtë periudhë jashtëzakonisht të vështirë.
“Pusho në paqe, Jimmy.” Manchester United shkroi në rrjetin social X se klubi ishte “thellësisht i pikëlluar” nga lajmi për vdekjen e tij, duke shtuar: “Mendimet tona janë me të dashurit e Jimmyt në këtë periudhë të vështirë.” Edhe Arsenali, që e kishte transferuar Rimmerin në mesin e viteve ’70, e nderoi ish-portierin.
“Është me pikëllim që të gjithë në klub mësuam për ndarjen nga jeta të ish-portierit të Arsenalit, Jimmy Rimmer. “Jimmy mungoi vetëm në dy ndeshje gjatë tri sezoneve në mesin e viteve ’70, duke zhvilluar 146 ndeshje për ‘Gunners’ dhe duke fituar çmimin e lojtarit të vitit të klubit në vitin 1975.
“Mendimet tona janë me familjen dhe të dashurit e Jimmyt në këtë periudhë të vështirë.” Rimmer lindi në Southport në shkurt të vitit 1948 dhe iu bashkua Manchester Unitedit si nxënës në vitin 1963, ndërsa u bë profesionist dy vjet më vonë. Ai qëndroi për 11 vjet në “Old Trafford”, kryesisht si zëvendësues i Alex Stepneyt.
Gjatë kësaj periudhe pati edhe një huazim te Swansea City, përpara se në vitin 1974 të transferohej te Arsenali, ku zhvilloi 146 paraqitje. Tre vjet më vonë, trajneri Ron Saunders e transferoi te Aston Villa për shumën prej 65 mijë paundësh.
Pas debutimit kundër Queens Park Rangers, ai u bë portieri i parë i klubit për gjashtë sezone radhazi, duke zhvilluar 287 paraqitje në kampionat dhe kupa. Pas rikuperimit nga dëmtimi në qafë, Rimmer ishte portieri i rregullt i Aston Villas në gjysmën e parë të sezonit 1982-83, përpara se të zhvillonte ndeshjen e tij të fundit në një derbi lokal pak pas Krishtlindjeve.
Në vitin 1983 u rikthye te Swansea, këtë herë në mënyrë të përhershme, ndërsa më vonë punoi si trajner në Kinë dhe Kanada. Rimmer luajti vetëm një ndeshje për Anglinë, duke fituar paraqitjen e tij të vetme në vitin 1976 kundër Italisë. Edhe kombëtarja angleze i bëri homazhe portierit, duke shkruar në X: “Pusho në paqe, Jimmy Rimmer.” Sinjali – aty ku e vërteta flet para lajmit!