Ekipi “Velipoja.V” është shpallur fitues i turneut “Beach Soccer Velipoja 2026”, një aktivitet i organizuar nga Federata Shqiptare e Futbollit në bashkëpunim me Bashkinë Shkodër. Në finalen e turneut, “Velipoja.V” triumfoi me rezultatin 2-0 ndaj KF Shkodrës, në një përballje të luftuar dhe me ritëm të lartë.
Golat që i dhanë trofeun skuadrës fituese u shënuan nga Elis Dervishi dhe Vildan Kaçubela. Turneu zhvilloi aktivitetin përgjatë tre ditëve, me pjesëmarrjen e 8 ekipeve të ndara në dy grupe. Pas ndeshjeve të fazës së grupeve dhe gjysmëfinaleve, “Velipoja.V” dhe KF Shkodra siguruan një vend në finalen e madhe, ku në fund ishte skuadra vendase ajo që festoi trofeun.
Në përfundim të aktivitetit u zhvillua edhe ceremonia e ndarjes së trofeut dhe medaljeve për ekipin fitues. Trofeun e dorëzoi Alban Hasani, Specialist i Zyrës së Sportit pranë Bashkisë Shkodër.
“Beach Soccer Velipoja 2026” vjen si një tjetër aktivitet që promovon futbollin dhe sportin në komunitet, duke krijuar mundësi për përfshirjen e ekipeve dhe sportdashësve në aktivitete sportive gjatë sezonit veror.