Mbrojtësi i Kombëtares së Shqipërisë, Bujar Pllana, është transferuar te Grasshoppersi i Zvicrës. Klubi zviceran ka njoftuar se ka arritur marrëveshje me mbrojtësin 24-vjeçar, i cili ka firmosur kontratë dyvjeçare, të vlefshme deri në qershor të vitit 2028. Pllana te Grasshoppers do të mbajë fanellën me numrin 44, ndërsa në klubin e ri vjen nga skuadra polake Lechia Gdansk.
Grasshoppers e përshkruan Pllanën si një qendërmbrojtës të kompletuar, me aftësi të forta fizike dhe teknike, duke e konsideruar atë një përforcim të rëndësishëm për repartin defensiv. Pas transferimit, Pllana ka shprehur kënaqësinë për aventurën e re. “Jam shumë i lumtur që jam këtu. Që nga fillimi u binda nga projekti dhe gjatë bisedimeve e ndjeva menjëherë besimin.
Mezi pres të luaj për herë të parë para tifozëve tanë”, ka deklaruar Pllana.