Të paktën 18 persona kanë humbur jetën dhe dhjetëra të tjerë janë lënduar në një aksident të rëndë trafiku në veri të Egjiptit, pas përplasjes së dy kamionçinave që transportonin punëtorë bujqësorë. Aksidenti ka ndodhur në një rrugë në zonën e Ismailisë, pranë Kanalit të Suezit.
Sipas raportimeve fillestare, shumica e viktimave ishin adoleshentë, ndërsa në mesin e të vdekurve kishte edhe të mitur. Viktima më e re raportohet të ketë qenë vetëm 10 vjeç. Ministria egjiptiane e Shëndetësisë njoftoi fillimisht se në aksident ishin përfshirë gjithsej 47 persona dhe se rreth 30 prej tyre kishin mbetur të lënduar.
Autoritetet kanë nisur hetimet për të përcaktuar shkaqet dhe rrethanat që çuan në përplasjen fatale. Kamionçinat përdoren gjerësisht në Egjipt për transportimin e punëtorëve informalë, përfshirë edhe të mitur. Këto automjete shpesh transportojnë një numër të madh personash, duke e bërë këtë formë transporti veçanërisht të rrezikshme. Sinjali – aty ku e vërteta flet para lajmit!