Aktori Brad Pitt ka folur për një periudhë të vështirë të jetës së tij, të cilën e lidhi me “çështje familjare”. Në një intervistë për revistën Esquire, aktori 62-vjeçar tha se, ndonëse nuk kishte pasur më parë mendime vetëvrasëse, për një periudhë të shkurtër e kishte pasur të vështirë të shihte një rrugëdalje nga dhimbja që po përjetonte.
Pitt sqaroi se nuk kishte ndërmend të vepronte mbi këto mendime, por tha se përjetoi një moment kur dhimbja mendore ishte aq e fortë, sa e bëri të kuptonte se si një person mund ta shihte vetëvrasjen si një mënyrë për t’u çliruar prej saj. “Nuk kam pasur kurrë mendime vetëvrasëse për asnjë arsye.
Thjesht nuk ishte në natyrën time” , tha Pitt, duke e përshkruar veten si një “optimist të natyrshëm”. Sipas tij, ky optimizëm e ka ndihmuar në jetë, por në disa raste edhe e ka shtyrë të marrë vendime të gabuara. Duke folur për periudhën e vështirë, aktori tha se për një kohë të shkurtër nuk arrinte të shihte një rrugëdalje nga dhimbja. “Në atë periudhë të shkurtër, thjesht mendova…
Nuk mundesha, thjesht nuk mundesha të shihja një rrugëdalje. Dhimbja ishte aq e fortë” , rrëfeu ai. Pitt shpjegoi se kjo përvojë ndryshoi mënyrën se si e kuptonte vetëvrasjen. Sipas tij, nuk bëhej fjalë për dëshirën për të vdekur, por për një kërkim për t’i dhënë fund dhimbjes. “Dhe mendova: ‘Në rregull, tani e kuptoj’. E kuptoj vetëvrasjen në kuptimin që është thjesht lehtësim.
Është thjesht kërkim lehtësimi nga dhimbja” , tha aktori. Ai shtoi se beson te instinkti i mbijetesës dhe se, në rastin e tij, ky instinkt “ hyri menjëherë në lojë”. Pitt nuk dha detaje mbi atë që kishte shkaktuar periudhën e vështirë. Kur gazetari e pyeti nëse bëhej fjalë për fëmijët e tij, aktori u përgjigj: “Çështje familjare. Le ta lëmë me kaq”.
Deklaratat vijnë në një periudhë kur Pitt është larguar nga disa prej anëtarëve të familjes së tij. Aktori dhe Angelina Jolie u ndanë në vitin 2016, ndërsa divorci i tyre u finalizua në vitin 2024, pas vitesh përplasjesh ligjore. Çifti ka gjashtë fëmijë: Maddox, Zahara, Shiloh, Pax, Knox dhe Vivienne. Katër prej fëmijëve kanë kërkuar të heqin mbiemrin “Pitt” nga emrat e tyre.
Kërkesa e Shiloh u miratua në gusht 2024, ndërsa kërkesat e Zahara dhe Maddox mbeten në pritje, sipas informacionit të përcjellë në material. Pitt nuk ka komentuar publikisht mbi vendimet e fëmijëve të tij. Në një intervistë të mëparshme, ai kishte folur për rëndësinë që ka për të të jetë pranë njerëzve që do dhe që e duan.