Inteligjenca Artificiale është përdorur për projektimin e viruse të reja që janë plotësisht funksionale dhe mund të replikohen në laborator, thonë studiuesit amerikanë, raporton televizioni britanik, BBC.
Është hera e parë që gjenome të tëra projektohen me sukses nga Inteligjenca Artificiale. 16 viruse të reja që rezultuan u krijuan për t’i infektuar bakteret dhe nuk përbënin kërcënim për njerëzit. Ky zbulim është etiketuar si “pikë kthese shumë e rëndësishme” në shkencë që mund të hapë një epokë të re për trajtimin e sëmundjeve.
Por ekspertët kanë paralajmëruar gjithashtu se viruset e projektuara nga Inteligjenca Artificiale ngrenë shqetësime “urgjente” për sigurinë. Mjetet e Inteligjencës Artificiale po përparojnë me shpejtësi dhe tashmë janë përdorur për projektimin e antibiotikëve të rinj. Por kjo është relativisht e thjeshtë krahasuar me projektimin e një virusi të ri të qëndrueshëm nga e para.
“Ky është një hap tjetër në kompleksitetin që mund të projektohet nga Inteligjenca Artificiale gjeneruese, kjo është hera e parë që Inteligjenca Artificiale gjeneruese përdoret për projektimin e një gjenomi të plotë, është diçka që mund të replikohet dhe të ketë funksione të tjera brenda qelizave… ky ishte një territor i ri për ne”, ka treguar për BBC-në Brian Hie, profesor asistent në Universitetin e Stanfordit.
Teknologjia funksionon ngjashëm me modelet e mëdha gjuhësore, si ChatGPT, të cilat parashikojnë sekuencat e tekstit. Në këtë rast, modelet e Inteligjencës Artificiale, të njohura si Evo1 dhe Evo2, parashikojnë gjuhën e jetës në vend të fjalëve. Modelet e Inteligjencës Artificiale u trajnuan në kode gjenetike nga viruset, bakteret, bimët dhe njerëzit.
Ato u rafinuan më pas për të prodhuar një lloj virusi, të njohur si bakteriofag, i cili infekton vetëm lloje specifike të baktereve. Hulumtuesit e Stanfordit zgjodhën 302 modelet më premtuese të Inteligjencës Artificiale dhe i sintetizuan ato në laborator. Nga këto, 16 rezultuan efektive në vrasjen e baktereve E. coli. Përgatiti: Rexhep Maloku – Kallxo.com