Pamjet e kamerave të sigurisë nga një spital në Kumamoto të Japonisë kanë regjistruar momentin kur një tërmet i fuqishëm me magnitudë 7.1 goditi sallën e operacionit gjatë një ndërhyrjeje kirurgjikale. Videoja tregon kirurgët duke mbrojtur pacientin, ndërsa pajisjet mjekësore lëvizin dhe bien për shkak të lëkundjeve të forta.
Në pamje shihet se si salla e operacionit lëkundet fuqishëm, ndërsa disa anëtarë të stafit humbin ekuilibrin. Dy kirurgë mbajnë fort tavolinën e operacionit për të mbrojtur pacientin deri në përfundimin e tërmetit. Sipas mediave japoneze, sapo lëkundjet u qetësuan, ekipi mjekësor vazhdoi ndërhyrjen dhe e përfundoi me sukses. Spitali rifilloi punën normale më 5 gusht.
Tërmeti goditi jugun e ishullit Kyushu më 28 korrik, duke lënë të vdekur 38 persona dhe mbi 120 të plagosur. Shumë ndërtesa u shembën ose u dëmtuan, mijëra familje mbetën pa energji elektrike dhe rrugët pësuan çarje të mëdha. Rreth 79 mijë banorë mbetën për ditë të tëra pa ujë, ndërsa 9 mijë persona u strehuan në qendra të përkohshme. Lëkundjet u ndjenë deri në Korenë e Jugut.
Ndër zonat më të goditura ishte qyteti Hikawa, ku u dëmtuan ose u shkatërruan mbi 800 shtëpi. Në shembjen e një qendre tregtare në Kashima humbën jetën të paktën shtatë persona, ndërsa shumë banorë u detyruan të flinin në automjetet e tyre.