Irani ka paralajmëruar shtetet e Gjirit se çdo sulm i ri i Shteteve të Bashkuara ndaj territorit iranian do të pasohet me kundërpërgjigje ndaj infrastrukturës kritike energjetike në rajon. Sipas pesë burimeve të cituara nga Reuters, Teherani synon ta rrisë koston e çdo veprimi të mundshëm ushtarak, duke ushtruar presion ndaj aleatëve rajonalë të Uashingtonit.
Paralajmërimi është përcjellë përmes kontakteve diplomatike të nivelit të lartë, pasi presidenti amerikan Donald Trump kërcënoi më 28 korrik me sulme ndaj rrjetit dhe infrastrukturës energjetike të Iranit. Ministri i Jashtëm iranian, Abbas Araqchi, raportohet se ka zhvilluar biseda me homologët e tij nga Arabia Saudite, Turqia dhe Katari, si dhe me shefin e ushtrisë së Pakistanit.
Sipas burimeve, mesazhi i Iranit ishte se goditja e infrastrukturës së tij mund të shkaktonte sulme hakmarrëse ndaj objekteve energjetike dhe infrastrukturës tjetër jetike në shtetet e Gjirit.
Zhvillimet shënojnë një përshkallëzim të ri të tensioneve në rajon dhe kanë shtuar shqetësimet për furnizimin global me energji, pasi vendet e Gjirit janë ndër eksportueset kryesore të naftës dhe gazit. Sinjali – aty ku e vërteta flet para lajmit!