Një studim i ri ka ngritur shqetësime se ekspozimi i vazhdueshëm ndaj pesticideve – kimikateve që përdoren për mbrojtjen e kulturave bujqësore nga insektet dhe barërat e këqija – mund të rrisë ndjeshëm rrezikun për zhvillimin e sklerozës laterale amiotrofike (ALS), një sëmundje e rëndë dhe aktualisht e pashërueshme.
Pas analizimit të studimeve të kryera në mbarë botën gjatë 35 viteve të fundit, shkencëtarët zbuluan se personat që punojnë me pesticide kanë 61% deri në 71% më shumë gjasa të preken nga ALS , krahasuar me ata që nuk janë të ekspozuar ndaj këtyre kimikateve. Studimi tregon gjithashtu se sa më i madh dhe më i gjatë të jetë ekspozimi ndaj pesticideve, aq më i lartë është edhe rreziku .
Te burrat, lidhja ishte edhe më e fortë – ata rezultuan të kishin rreth dy herë më shumë gjasa të zhvillonin sëmundjen nëse kishin punuar me pesticide. Çfarë është ALS? ALS është një sëmundje që sulmon qelizat nervore përgjegjëse për kontrollin e muskujve.
Me kalimin e kohës, personi humbet gradualisht aftësinë për të lëvizur, folur, gëlltitur ushqimin dhe, në fazat e avancuara, edhe për të marrë frymë. Fatkeqësisht, nuk ekziston ende një kurë për ALS , ndërsa shumica e pacientëve jetojnë më pak se pesë vjet pas diagnostikimit. Çfarë janë pesticidet?
Pesticidet janë substanca kimike që përdoren në bujqësi për të mbrojtur bimët nga insektet, kërpudhat dhe barërat e këqija. Me to ekspozohen më shpesh fermerët, punëtorët bujqësorë dhe persona të tjerë që punojnë rregullisht me këto produkte.
Megjithatë, studiuesit theksojnë se ky studim nuk provon se pesticidet shkaktojnë drejtpërdrejt ALS , por tregon një lidhje të fortë mes ekspozimit ndaj tyre dhe rritjes së rrezikut për zhvillimin e kësaj sëmundjeje. Për ta vërtetuar plotësisht këtë lidhje nevojiten studime të tjera. Sinjali – aty ku e vërteta flet para lajmit!