Ushtria Amerikane ka përdorur pjesën më të madhe të rezervave të saj globale të raketave precize me rreze të gjatë në luftën pesëmujore me Iranin, ka raportuar të mërkurën () Reuters , duke iu referuar tre personave të informuar me të dhënat, duke ngritur shqetësime lidhur me gatishmërinë e ushtrisë për konflikte të ardhshme.
Raketat janë kryesisht tokë-tokë të Ushtrisë, të njohura si Sisteme Raketash Taktike të Ushtrisë (ATACMS) dhe Raketa Sulmi Preciz (PrSM). SHBA-ja ka përdorur “pothuajse të gjitha” këto armë, kanë njoftuar dy burime. Shkalla në të cilën ushtrisë po i mbarojnë ATACMS-të dhe Raketat e Sulmit Preciz nuk është raportuar më parë.
Municionet me rreze të gjatë veprimi – të cilat kushtojnë më shumë se 1 milion dollarë gjithësecila – janë pjesë e rëndësishme e arsenalit të Ushtrisë, duke mundësuar sulme të sakta nga një distancë e sigurt. ATACMS të furnizuara nga SHBA-ja kanë luajtur rol kyç në luftën në Ukrainë, duke ua lejuar forcave ukrainase të sulmojnë objektiva brenda Rusisë.
PrSM-të janë gjeneratë më e re dhe më e përparuar që do të zëvendësojë ATACMS-të, të cilat kanë rreze më të shkurtër veprimi. Rënia dramatike e raketave me precizion dhe rreze të gjatë veprimi do të thotë që presidenti i SHBA-së, Donald Trump, mund të detyrohet të mbështetet më shumë në misione bombardimi më të rrezikshme dhe të pilotuara nëse rinis sulme në shkallë të gjerë ndaj Iranit.
Burimet nuk pranuan të thoshin sesa nga secili municion i ka mbetur SHBA-së. Trump e nisi luftën e Iranit së bashku me Izraelin në shkurt, duke parashikuar se konflikti do të zgjaste pak.
Por, ndërsa lufta vazhdon, tre personat e njohur me çështjen shprehën shqetësim se rënia e furnizimeve me raketa mund të kufizojë aftësinë e SHBA-së për të penguar kundërshtarët, përfshirë Rusinë dhe Kinën. Një person i katërt i informuar me çështjen ka thënë se pavarësisht përdorimit të lartë të armëve me precizion, SHBA-ja mund të rifurnizohet.
Komanda Qendrore – e cila mbikëqyr forcat amerikane në Lindjen e Mesme – ka qenë në gjendje të riarmatoset nga furnizimet ushtarake amerikane në të gjithë botën, ka thënë burimi. Burimet e intervistuara për këtë histori shkrim kanë folur me kusht anonimiteti.
E pyetur për koment mbi të dhënat e rezervave, Shtëpia e Bardhë ka lëshuar një deklaratë nga Trump, duke thënë se SHBA-ja ka “shumë më shumë municione se kushdo në botë” dhe “shumë më shumë sesa na duhen”.
“Kompanitë tona të mbrojtjes, në këtë moment, po prodhojnë më shumë municione sesa kanë prodhuar ndonjëherë më parë, përveç zgjerimit të fabrikave dhe pajisjeve të tyre në nivele rekord”, ka thënë Trump.
Analistët pajtohen se disa municione, duke përfshirë predha artilerie dhe disa lloje raketash, po prodhohen në nivele rekord, por paralajmërojnë se furnizimet mund të mos jenë të mjaftueshme për atë që nevojitet për një luftë të zgjatur. Përgatiti: Rexhep Maloku – Kallxo.com