UEFA ka miratuar ndryshime të rëndësishme në rregulloren disiplinore për garat evropiane për klube, të cilat do të hyjnë në fuqi nga sezoni 2026/27.
Sipas rregullave të reja, futbollistët dhe zyrtarët e skuadrave në Champions League, Europa League dhe Conference League do të pezullohen automatikisht për një ndeshje vetëm pasi të grumbullojnë katër kartonë të verdhë që nuk rezultojnë me përjashtim. Deri më tani, pezullimi aktivizohej pas kartonit të tretë të verdhë.
Vendimi vjen pas ndryshimit të formatit të garave nga UEFA, me fazën e ligës në Champions League dhe Europa League që tashmë përfshin tetë ndeshje në vend të gjashtë. I njëjti sistem disiplinor do të zbatohet edhe në Ligën e Konferencës, duke unifikuar rregullat në të tri kompeticionet evropiane.
Po ashtu, UEFA ka konfirmuar se pezullime të tjera do të shqiptohen pas çdo dy kartonëve të verdhë shtesë. Kjo nënkupton se futbollistët ose zyrtarët do të mungojnë edhe pas kartonit të gjashtë, të tetë, të dhjetë dhe çdo dy kartonëve pasues.