Ajax ka zyrtarizuar transferimin e portierit gjerman Marc-Andre ter Stegen nga Barcelona në formë huazimi njëvjeçar. 34-vjeçari ishte përfolur prej muajsh për një kalim te gjiganti holandez, ndërsa marrëveshja u finalizua pasi Barcelona dhe futbollisti arritën të zgjidhnin çështjet financiare që kishin vonuar transferimin.
Ter Stegen iu bashkua Barcelonës në vitin 2014 nga Borussia Monchengladbach dhe gjatë 12 sezoneve me klubin katalanas zhvilloi 423 ndeshje zyrtare. Me fanellën e Barcelonës, portieri gjerman fitoi 20 trofe, përfshirë shtatë tituj të La Ligës dhe trofeun e Ligës së Kampionëve në vitin 2015.
Ajax e afron Ter Stegenin pas një sezoni zhgënjyes në Eredivisie, ku skuadra e Amsterdamit e mbylli kampionatin në vendin e pestë me 63 pikë. Megjithatë, holandezët siguruan pjesëmarrjen në kualifikimet e Ligës së Konferencës dhe tashmë kanë avancuar në raundin e tretë, ku do të përballen me skuadrën irlandeze Shelbourne.
Ter Stegen bëhet përforcimi i pestë i Ajaxit gjatë kësaj vere, pas afrimeve të Daley Blind, Caio Henrique, Marcos Leonardo, Tolu Arokodare dhe Julian Brandt. Pavarësisht huazimit te Ajaxi, portieri gjerman mbetet nën kontratë me Barcelonën deri në verën e vitit 2028.