Programi i avionit luftarak F-47 të Forcave Ajrore të Shteteve të Bashkuara ka hyrë në fazën e zhvillimit të inxhinierisë dhe prodhimit, ndërsa fluturimi i parë pritet të realizohet në vitin 2028.
Gjenerali Dale White, drejtor i Sistemeve të Armëve të Mëdha Kritike, deklaroi se programi ka hyrë në këtë fazë me një nivel të lartë gatishmërie, falë bashkëpunimit të ngushtë me kompanitë e industrisë së mbrojtjes. Faza e re përfshin zhvillimin, integrimin dhe testimin e të gjitha sistemeve të avionit.
Për këtë qëllim do të prodhohet fillimisht një numër i kufizuar avionësh, të cilët do t’u nënshtrohen testimeve dhe vlerësimeve të detajuara. Sipas planeve aktuale, Boeing F-47 i parë pritet të kryejë fluturimin inaugurues në vitin 2028. Forcat Ajrore amerikane synojnë të blejnë të paktën 185 avionë të këtij modeli, të cilët do ta zëvendësojnë gradualisht flotën e F-22 Raptor.
“F-47 do të fluturojë gjatë kësaj administrate”, deklaroi White gjatë konferencës së organizuar nga Qendra e Menaxhimit të Ciklit të Jetës së Forcave Ajrore. F-47 po zhvillohet në kuadër të programit “Next Generation Air Dominance”, i njohur si NGAD, dhe synon të jetë avioni kryesor luftarak amerikan i gjeneratës së gjashtë.
Vendimi për vazhdimin e zhvillimit të këtij avioni ishte bërë publik në mars të vitit 2025 nga presidenti amerikan Donald Trump. Në atë kohë, Trump kishte deklaruar se F-47 do të kishte aftësi të avancuara në shpejtësi, manovrim dhe kapacitet luftarak, duke e cilësuar atë si një avion pa precedent në historinë e aviacionit ushtarak. Sinjali – aty ku e vërteta flet para lajmit!