Emërimi i Roberto Mancinit në postin e trajnerit të kombëtares së Italisë ka shkaktuar pakënaqësi te disa klube të Serie A, jo vetëm për shkak se preferenca e tyre ishte Antonio Conte, por edhe për mënyrën se si është marrë vendimi nga drejtuesit e Federatës Italiane të Futbollit.
Sipas raportimeve të mediave italiane si “Corriere della Sera”, “Tuttosport” dhe “Gazzetta dello Sport”, presidentët e klubeve të Serie A e konsideronin Conten kandidatin ideal për pankinën e “Azzurrëve” dhe madje ishin të gatshëm të kontribuonin në pagesën e një pjese të pagës së tij. Megjithatë, pakënaqësia kryesore e tyre lidhet me procesin e vendimmarrjes.
Klubet besojnë se presidenti i FIGC-së, Giovanni Malago, duhej t’i përfshinte në diskutime para se të merrte vendimin për trajnerin e ri, në vend që ta zgjidhte i vetëm. Kjo situatë ka krijuar zhgënjim të madh te përfaqësuesit e Serie A, veçanërisht pasi klubet kishin mbështetur zgjedhjen e Malagos në krye të FIGC-së, ku ai u zgjodh më 22 qershor duke mposhtur Giancarlo Abeten.
Sipas raportimeve, drejtuesit e klubeve besojnë se marrëdhënia e afërt mes Malagos dhe Mancinit ka ndikuar në këtë vendim, duke i bërë ata të ndihen të anashkaluar gjatë gjithë procesit.
Pakënaqësitë janë shprehur edhe gjatë mbledhjes së fundit të Këshillit Federal të FIGC-së, ku presidenti i Lega Serie A, Ezio Maria Simonelli, dhe përfaqësues të tjerë kanë kërkuar që komponentët e futbollit italian të dëgjohen para vendimeve të rëndësishme.
Nga ana tjetër, Malago ka mbrojtur vendimin e tij, duke theksuar se nuk kishte më kohë për të humbur pas situatave të fundit me Andrea Pirlon, si dhe largimit të Paolo Maldinit dhe Leonardo-s.
Në fund, Serie A publikoi një deklaratë ku mirëpriti Roberto Mancinin dhe drejtorin teknik Claudio Ranierin, duke theksuar se tashmë prioriteti duhet të jetë bashkimi dhe bashkëpunimi për të ardhmen e futbollit italian.
Megjithatë, mediat italiane mbeten skeptike për vazhdimësinë e këtij bashkëpunimi, duke ngritur pikëpyetje se sa gjatë do të zgjasë kjo marrëdhënie mes Federatës dhe klubeve të elitës italiane.