Një rafineri nafte në rajonin Tyumen të Siberisë Perëndimore ka ndalur plotësisht përpunimin e naftës bruto dhe prodhimin e derivateve, pas një sulmi me dron gjatë fundjavës. Sipas burimeve të industrisë për Reuters, sulmi ka shkaktuar dëme në njësitë e përpunimit dytësor të rafinerisë, duke vështirësuar vlerësimin se sa kohë do të zgjasin riparimet.
Guvernatori i rajonit Tyumen, Alexander Moor, konfirmoi se një dron ukrainas goditi rafinerinë të shtunën, duke shkaktuar zjarr në objekt, shkruan The Moscow Times, përcjell Sinjali. Nga sulmi më 25 korrik, sipas burimeve, janë dëmtuar një njësi për trajtimin e naftës për prodhimin e dizelit me kapacitet 2.6 milionë tonë në vit, si dhe një njësi për prodhimin e benzinës me oktan të lartë.
Rafineria në pronësi të kompanisë RI-Invest ka kapacitet të përgjithshëm prej 9 milionë tonësh naftë në vit. Gjatë vitit 2024, ajo përpunoi 5.7 milionë tonë naftë bruto, duke prodhuar rreth 2.8 milionë tonë dizel dhe 500 mijë tonë benzinë. Kompania RI-Invest nuk ka komentuar publikisht për dëmet e shkaktuara.
Ndërkohë, kjo njësi kishte qenë edhe më herët në riparim pas një zjarri të shkaktuar nga probleme teknike në muajin qershor. Putini thotë se pesë vjetët e fundit ishin “shumë të vështira” për Rusinë Sinjali – aty ku e vërteta flet para lajmit!