Autoritetet iraniane kanë ekzekutuar dy protestues në publik në sheshin e Isfahanit, “Shahid Alikhani”, ku forca të shumta sigurie u vendosën gjatë natës mes raportimeve për përleshje ndërmjet rojeve e civilëve që u mblodhën pranë vendit, ka raportuar të martën () televizioni Euronews .
Sipas agjencisë iraniane të lajmeve Mizan – e lidhur me gjyqësorin – dhe agjencisë së lajmeve Fars – e lidhur me aparatin shtetëror – dy burrat, Amirhossein Safari Hosseinabadi e Abolfazl Sepahi Badjiani u ekzekutuan herët në mëngjes të martën në Lagjen Malekshahr në Isfahan.
Të dy ishin në mesin e 12 të rinjve të dënuar me vdekje në një rast të lidhur me protestat që shpërthyen në të njëjtin shesh më 8 janar. Autoritetet iraniane akuzuan të pandehurit për përfshirje në vrasjen e katër anëtarëve të milicisë “Basij” dhe njësive speciale gjatë përleshjeve në zonë, si dhe për zjarrvënie dhe vandalizëm.
Fars ka raportuar se të pandehurit u akuzuan për vrasjen e personelit të sigurisë gjatë protestave, duke pretenduar se oficerët u sulmuan, u vunë dogjën dhe u vranë gjatë trazirave. Ekzekutimet u kryen pas orësh shqetësimi në rritje në mediat sociale lidhur me raportimet se një skelë hekuri ishte instaluar në “Sheshin Alikhani”.
Videot e shpërndara në internet treguan strukturën që po përgatitej dhe forcat e sigurisë që po rrethonin zonën. Raportet nuk mund të verifikohen në mënyrë të pavarur.
Dëshmitarët dhe përdoruesit e mediave sociale thanë se sheshi ishte nën masa të rrepta sigurie gjithë natës së hënë, me disa dëshmitarë që raportuan për konfrontime të shkurtra midis forcave të sigurisë dhe njerëzve që u mblodhën në vend.
Një burim i afërt me familjen e Safarit ka thënë se të afërmit ishin thirrur në Burgun Qendror të Isfahanit për atë që ata besonin se mund të ishte një vizitë e fundit para ekzekutimit të tij. Dy ekzekutimet vijnë pas vdekjes së dy të pandehurve të tjerë në të njëjtin rast.
Golmohammad Mohammadi dhe Erfan Esfandiari u ekzekutuan nga autoritetet iraniane më 19 korrik, duke e çuar numrin total të ekzekutimeve të lidhura me rastin e “Sheshit Alikhani” në katër syresh. Tetë të pandehur të tjerë vazhdojnë të përballen me dënime me vdekje.
OKB-ja bën thirrje që të ndalen ekzekutimet Ekzekutimet u kryen pavarësisht thirrjeve nga ekspertët e të drejtave të njeriut të Kombeve të Bashkuara që Irani të heqë dorë prej dënimeve të planifikuara me vdekje.
Më herët të hënën, ekspertët, të udhëhequr nga Mai Sato, raportuesja speciale e OKB-së për situatën e të drejtave të njeriut në Iran, i kërkuan Teheranit të ndalte ekzekutimet e të pandehurve të mbetur, duke thënë se procedurat ligjore ngritën shqetësime serioze lidhur me standardet e gjykimit të drejtë.
“Dënimi i 12 personave me vdekje në një seancë dëgjimore, në një sallë gjyqi të mbyllur dhe pa qartësi sa i përket përgjegjësisë individuale të secilit të pandehur shkel standardet e vendosura të gjykimit të drejtë”, kanë vlerësuar ekspertët.
OKBja ka thënë se të pandehurit, shumë prej të cilëve në fund të adoleshencës, ose në fillim të të njëzetave në kohën e arrestimeve, thuhet se ishin përballur me paraburgim arbitrar, zhdukje me forcë dhe, në disa raste, keqtrajtim.
Sipas ekspertëve të OKB-së, dënimet mbështeten kryesisht në rrëfimet e transmetuara në televizionin shtetëror, ndërsa seancat dëgjimore para Gjykatave Revolucionare të Iranit u mbajtën me dyer të mbyllura dhe vendimet nuk u publikuan. Midis atyre që ende përballen me ekzekutimin është Shervin Bagherian Jebeli, i cili mbushi 18 vjet pak para arrestimit.
Ekspertët e OKB-së kanë thënë se televizioni shtetëror iranian transmetoi rrëfimin e tij brenda një jave nga paraburgimi dhe para se të zhvillohej ndonjë gjyq. Zyra e OKB-së për të drejtat e njeriut ka thënë se të paktën 24 persona janë ekzekutuar sivjet lidhur me protestat e janarit.
Teherani ka thënë se 3.117 persona u vranë gjatë protestave që filluan në kryeqytetin iranian në dhjetor për shkak të hiperinflacionit të papritur, por më pas shpejt u kthyen në demonstrata antiqeveritare në krejt vendin.
Grupet e të drejtave të njeriut kanë raportuar shifra dukshëm më të larta, duke arritur në 42 mijë, ndërsa zyrtarët e OKB-së kanë thënë se shkalla e plotë e viktimave civile mbetet e vështirë për t’u verifikuar për shkak të kufizimeve në qasjen në informacion dhe ndërprerjeve të internetit. Përgatiti: Rexhep Maloku – Kallxo.com