Turneu Grand Slam “US Open” ka bërë zyrtare listën e pjesëmarrësve për edicionin e këtij viti, që do të zhvillohet nga 30 gushti deri më 13 shtator. Në mesin e emrave më të spikatur është edhe kampioni në fuqi, Karlos Alkaraz, i cili do të rikthehet për të mbrojtur titullin e fituar sezonin e kaluar.
Pas konfirmimit të rikthimit të tij në fushat e tenisit në turneun e Sinsinatit, tenisti nga Murcia do të marrë pjesë edhe në Grand Slamin e fundit të sezonit, me synimin për të ruajtur kurorën në Nju Jork. Alkaraz do të synojë të fitojë titullin e tij të tretë në tokën amerikane.
Megjithatë, para “US Open” ai do të kërkojë të rifitojë ritmin dhe formën në turnetë përgatitore, pasi ka munguar për rreth katër muaj për shkak të dëmtimit në kyçin e dorës, të pësuar në mesin e muajit prill gjatë turneut të Barcelonës. Madje, fundjavën e kaluar ai u pa në finalen e Kupës së Botës mes Spanjës dhe Argjentinës me një fashë mbrojtëse në atë zonë.
“US Open” mbetet skena ideale për rikthimin e shumëpritur të Alkarazit. Pikërisht në këtë turne ai fitoi titullin e parë Grand Slam në karrierë, në moshën vetëm 19-vjeçare, pasi mposhti norvegjezin Kasper Rud në finale. Gjithashtu, ai ruan kujtime të mira edhe nga fitorja e fundit ndaj Janik Siner, të cilin e mundi në katër sete pas një paraqitjeje të shkëlqyer.
TURNEU MBLEDH YJET “US Open” do të sjellë në Nju Jork emrat më të mëdhenj të tenisit. Janik Siner dhe Arina Sabalenka do ta nisin turneun si numrat një të botës në kategoritë përkatëse, ndërsa pjesë e garës do të jenë edhe Aleksandër Zverev, Novak Xhokoviç, Tejlor Fritz, Elena Ribakina, Xhesika Pegula dhe Koko Gauf.
Karlos Alkaraz dhe Arina Sabalenka do të mbrojnë titujt e fituar vitin e kaluar, ndërsa finalja e “US Open” do të zhvillohet më 13 shtator në stadiumin legjendar “Arthur Ashe”.