Arsenali ka rikthyer interesimin për yllin e Spanjës dhe Athletic Bilbaos, Nico Williams, teksa trajneri Mikel Arteta synon të forcojë repartin ofensiv për sezonin 2026/27. Sipas “TeamTalk”, drejtori sportiv i “Topçinjve”, Andrea Berta, ka riaktivizuar bisedimet për transferimin e 23-vjeçarit, duke shpresuar ta bindë atë të largohet nga Bilbao këtë verë.
Arsenali pritet të kërkojë një sulmues të ri krahu, pasi Leandro Trossard është pranë transferimit te Besiktasi, ndërsa edhe e ardhmja e Gabriel Martinellit mbetet e pasigurt. Williams ishte shumë pranë kalimit te Barcelona në vitin 2024, por pas një sage të gjatë transferimi vendosi të refuzojë klubin katalanas dhe rinovoi kontratën me Athletic Bilbaon.
Sezoni i fundit nuk ishte më i miri për reprezentuesin spanjoll për shkak të lëndimeve, të cilat e kufizuan në vetëm 20 paraqitje si titullar në La Liga. Megjithatë, ai ishte pjesë e Spanjës në Kupën e Botës 2026 dhe dha asistimin vendimtar për Ferran Torres, i cili shënoi golin e fitores në finalen ndaj Argjentinës. Pavarësisht problemeve fizike, vlera e Williams në treg mbetet e lartë.
Me Athletic Bilbaon që nuk arriti të sigurojë pjesëmarrjen në garat evropiane për sezonin 2026/27, klubi bask mund të shqyrtojë shitjen e një prej yjeve të tij për të përmirësuar gjendjen financiare. Kontrata e Williams përmban një klauzolë lirimi prej 77 milionë funtesh, një shumë që konsiderohet e përballueshme për Arsenalin.
Megjithatë, londinezët pritet të shesin disa lojtarë përpara se të bëjnë ofertën zyrtare për anësorin spanjoll.